Accessibility links

Кайнар хәбәр

Qazan İzge Ana ikonası- Qazannıqımı?


Bu “tügäräk östäl” Qazan şähäre administratsiäseneñ noyäber başında ütkärgän “Qazan İzge Ana ikonası, izge säyäxät häm perspektivalar” digän “tügäräk östälgä” cawap. Älege şähär administratsiäse başlanğıçı belän ütkärelgän “tügäräk östäldä”, sezgä söylägänebezçä xörmätle tıñlawçılarıbız, Vatikannan Rusiä pravoslavlarına tapşırılğan Qazan İzge Ana ikonasın Qazanğa kitertü mä’säläse tikşerelde. Anda Qazan ğalimnäre häm şähär administratsiäse wäkilläre, fänni yaqtan kilep, älege ikonanıñ iñ borınğı “spisok”, yäğni küçermä buluın, anıñ originalı päydä bulğan tarixi watanına qaytarıluınıñ farızlığın isbatladılar. Bu “tügäräk östäl”dä qatnaşuçı pravoslav häm islam dine wäkilläre ikonanı qaytarunı yaqlap tawış birüdä qatnaşmadılar. Ä çaqırılmıy kilgän BTİÜ citäkçeläre Zäki Zäynullin, Yunıs Kamaletdinov, Färit Xäbibullin qatğıy räweştä protest belderdelär häm çaralar kürergä wäğdä ittelär. Şulay itep cawap “tügäräk östäl”yen dä fänni nigezdä ütkärergä uylanılğan bulğan. Tügäräk östälgä tarixçı ğalimnär Fayaz Xucin,Änwär Xäyrullin, Rawil Amirxanov çaqırılğannar ide. Läkin alar “ kilä almıy qaldılar” dip iğlan itelde. Qatnaşuçılar isemlegendä dini konfessiä wäkilläre dä yuq ide. Şulay itep öç säğätkä suzılğan “tügäräk östäl” xalıq cıyını räweşenä kerde. Färit Xabibullin, Zäki Zäynullin häm Yunıs Kamaletdinovnıñ aldan äzerlänep quyılğan çığışlardan soñ telägän keşe küñelendä närsä bar şunı söyläde. Urta ber cirendä Malik Sabircan dip täqdim itelgän qatnaşuçı mä’sälägä fänni yaqtan kilergä çaqırdı. Anıñ fikerençä fänni yaqtan kilgändä mä’säläneñ öç aspektı bar- yuridik, ruxi häm mäğlümäti. Yäğni yuridik yaqtan kilgändä Vatikannan tapşırılğan ikonanı Qazanğa qaytarunı restitutsiä dip bäyäläp bulır ide. Läkin ikona origenal, yäğni töp nösxä bulmağaç monı restitutsiä- yäğni ildän alıp çıqqan malnı kire qaytaru dip bäyäläp bulmıy.Malik Sabircan fikerençä mäs’äläneñ başqa aspektları da ikonanıñ küçermä genä buluı belän mäğnälären yuğaltalar. Älege çığıştan soñ tağın ike säğät çaması dönya xälläre turında söyläşep utırğaç rezolyutsiäne tikşergändä yäş belgeçneñ dälilläre iskä lındı. Rezolyutsiäneñ töp punktında Qazan İzge Ana ikonasınıñ “spisok”, yäğni küçermä buluı basım yasap äytelde, häm ul bolay dip yazıldı. “Tügäräk östäldä qatnaşuçılar tatar xalqın qollıqqa qaldıru häm kolonializm qoralı sıyfatında xezmät itkän Qazan İzge Ana ikonasınıñ “spisok”ın (kopiäsen) Qazan şähärenä qaytaruğa qatğıy protest belderälär. Yunıs Ätnäle.

XS
SM
MD
LG