Accessibility links

Кайнар хәбәр

Başqortstan tatarları Qazanda oçraştı


Azatlıq radiosı inde söylägänçä, Başqortstan tatarları wäkilläre milli-mädäni möxtäriät qorıltayın ütkärü öçen Mäskäwgä barğanda, Qazanda tuqtalırğa tieş ide. Alarnıñ Tatarstan cirennän ütkändäge oçraşuları räsmi däwlät oyışmalarınıñ da, milli cämäğätçelekneñ dä zur qızıqsınuın uyattı. Başqortstan tatarları Qazanğa kilgäç, alarnı qabul itü mäşäqätlären Bötendönya tatar kongressı Başqarma komitetı üz östenä aldı. Kiçke säğät 7 Qazan milli-mädäni üzägeneñ konferensiälär zalına kongress citäkçeläre, Qazanda yäşäwçe Başqortstan tatarları, tatar ictimaği üzäge häm başqa milli oyışma wäkilläre cıyıldı. Läkin plan buyınça Ufadan avtobuslar belän qunaqlar Qazanğa şuşı waqıtta kilep töşärgä tieş bulsa da, alar äle Çallı tiräsendä genä buluı açıqlandı. Şulay da, yaqtaşların häm millättäşlären kürergä kilgän Qazan zıyalıları taralmadı, qunaqların kötte. Alar Tatarstanda yäşäwçe Başqortstan tatarlarınıñ tuğan yaqları belän elemtäläre, üzara xezmättäşlegen canlandıru turında fiker alıştı. Söyläşüne başlağanda kongress citäkçese Rinat Zakirov Başqortstan tatarları cämğiäten oyıştırğanda, ike respublikadan da wäkillär qatnaşuı faydalı bulır, dip belderde. Yaqtaşlarnıñ söyläşüe şaqtıy qızu bardı.

Nihayät, tönge 11 yartılarda, zur mäşäqät häm qatlawlı yullar uzıp qunaqlar da kilep citte. Monda, qayber mäğlümat çaralarında äytelgänçä, Mäskäwdä qorıltay ütkärergä baruçılar 15 tügel, ä 150 keşe ikänlegen häm alar arasında abruylı häm buldıqlı millättäşlärebez buluı açıqlandı. Milli cämäğätçelek häm Ufalılar ayaq öste genä aşap alğanda, citäkçelär oçraşunıñ yünäleşen bilgeläde. Başta süzne Rinat Zakirov aldı. Ul respublika tatarlarınıñ da Başqortstandağı millättäşlärebez belän ber uy-fikerdä buluı xaqında, berdämlekneñ kiräklege xaqında söyläde. Başqortstan tatarlarınıñ milli oyışmaları berlege räise Ramil Bignov üzeneñ cawap süzendä Qazanda alarnı qabul itüçelärgä räxmätlären belderde.

Şunda uq Qazan häm Ufa artistları, ayırım alğanda, Fäniä Säfärğälieva, Alsu Äbelxanova, Aydar Ğäbtdinov häm başqalar çığış yasadı. Ufadan kilgän şağirlär Färit Ğabdraxmanov häm Rim İdiätullin Başqortstan tatarları turında şiğerlär uqıdı. Annarı qunaqlar berniçä säğät yal itkännän soñ, irtänge säğät 6 Tübän Novgorodqa häm Mäskäwgä taba yul aldılar. Ä Mäskäwdä nindi xällär bulasın, alar qaytqan yañadan Qazanğa kerep, söylärgä wäğdä birep kittelär.

Gölnaz İlgizär

XS
SM
MD
LG