Accessibility links

Кайнар хәбәр

Ukraina parlamentı Yanukoviç xökümätenä ışanmawın belderde, prezident Kuçma isä ikençe turnı ğına qabatlawğa qarşı çığa


Ukrainadağı säyäsi krizisnı çişügä yardäm itü öçen çärşämbedä Kievkä yänä xalıqara aradaşçılar kilde, xörmätle tıñlawçılar. Läkin alar torğan sayın qatlawlana barğan wäzğiat aldında tora - Ukraina parlamentı irtän qızu bäxäslärdän soñ premyer-ministr Viktor Yanukoviç xökümätenä ışanmawın belderde. Läkin soñğı süzne bu mäs''älädä prezident Kuçma äytergä tieş, xökümät üz eşen barı tik prezident qararı belän genä tuqtata ala.

Ukrainadağı säyäsi krizis şulay itep tağın da tiränäyä töşte diärgä bula - qızu bäxäslärdän soñ Yuğarı rada oppozitsiä taläben qänäğätländerep Viktor Yanukoviç xökümätenä ışanmawın belderde.

Audio, Volodomir Lıtvin

229 deputatnıñ tawışı belän qabul itelgän şuşı qararnı oppozitsiä alqışlap qarşıladı, läkin monıñ xäzerge säyäsi wäzğiatkä tä''sire zur bulmas kebek, çönki xökümätne eşennän alu xoquqına barı tik prezident qına iä. Ä anıñ şundıy qatlawlı çorda fikerdäşe Viktor Yanukoviçne urınınnan aluı ikele. Älegä Leonid Kuçma Ukraina Yuğarı mäxkämäseneñ ikençe tur tawış birü barışın tikşergän utırışında anıñ näticäläreneñ qanuni bulu-bulmawın açıqlawnı kötä häm berük waqıtta üzeneñ, mäxkämä ikençe tur näticälären ğämäldän çığarsa, yaña saylawlarnı yaqlayaçağına işarä itä. Bu mäs''älädä ul yänä oppozitsiä belän kileşä almıy, çönki Yuçenko yağı näq menä ikençe turnı qabatlawnı alğa sörä.

Audio, Leonid Kuçma

"Yañadan tawış birü, yäğni ikençe turnı ğına qabatlaw fars bulır ide, min monı berqayçan da yaqlamayaçaqmın di Ukrainanıñ xäzerge prezidentı Kuçma. Soñğı xällär sürätendä xäzerge prezidentınıñ wäzğiatne çişü eşen üz qulına alırğa teläwe sizelä. Çärşämbedä üz yal utarında xökümätneñ qayber äğzaları belän ütkärgän kiñäşmädä ul, nizaqnı çişü maqsatında ildäge säyäsi köçlär arasında konstitutsion kileşügä ireşü kiräklege turında belderde. Prezident süzlärençä, ägär dä Yuğarı mäxkämä ikençe tur barışında tupas bozular häm xärämläşü buluın açıqlıy ikän, ildä xakimiat buşlığı xasil bulaçaq, moña yul quymas öçen bar säyäsi köçlär dä urtaq ber qararğa kilergä tieş. Yanukoviç kebek ük ikençe turnı ğına qabatlawğa qarşı çığuın Leonid Kuçma çärşämbe töştän soñ Kievtä xalıqara aradaşçılar belän başlanğan oçraşuda da qabatladı. Bu söyläşülärdä yänä Pol''şa wä Litva prezidentları Aleksandr Kwasniewski häm Valdas Adamkus, Yevropa Berlegeneñ tışqı säyäsät wä iminlek ölkäsendäge yuğarı wäkile Javier Solana, Yevropada iminlek wä xezmättäşlek oyışması başlığı Jan Kubiş, Rusiäneñ Däwlät Duması citäkçese Boris Grızlov, Ukraina parlamentı räise Volodimir Lıtvin qatnaşa. Soñraq alarğa ike köndäş nämzät - Viktor Yuçenko häm Viktor Yanukoviç tä quşılırğa tieş ide, läkin irtän Yanukoviçneñ awırıp kitüe turında xäbär itelde, şuña kürä anıñ söyläşülärgä quşıluı şikle. Ul arada Yanukoviçneñ tuğan yağı häm töp nığıtması Donetskidä cirle xakimiat, ölkäneñ Ukraina eçendä möstäqil ber subyekt buluı mäs''äläsen 9-nçı ğinwarda referendumğa çığaraçağın belderde. Bu qarar ölkä şurası utırışında qabul itelde.

Kärim Kamal
XS
SM
MD
LG