Tatar kongressı başqarma komitetınıñ mäğlümat çaraları komissiäse utırışı, eşlekle, küñelle, iğtibarnı cälep itärlek buldı, dip äytte anıñ eşendä qatnaşqan Kongress qunaqları. Yazılğan, radio-televideniedän äytelgän süzneñ ködräten belgän jurnalistlar, ozın häm küñelsez notıqlar yasamadı. Emotsiäle çığışlar yasadı, qızıqlı soralar birde. Mäglümat çarları komissiäse utırışı «Tatmedia» agentlığında ütte, anda kübesençä Rusiä töbäklärendä eşläwçe tatar xäbärçeläre, komissiägä kergän Tatarstan wäkilläre qatnaştı. Utırışnı Kongres başqarma komitetınıñ räise urınbasarı İlsur Xadiullin açıp cibärde. Annan soñ Miläwşä Aytuğanovağa «Yaña ğasır» kanalında soñğı yılda barlıqqa kilgän tapşırular turında söyläde, tatartsan sputnik kanalınıñ cäyelüe küläme türında mäğlmat birde. Anıñ äytüençä, 42 tapşırğıç belän kileşü tözelgän. 20 Rusiä töbäge qarıy, BDB illäre häm Estoniä, Skandinaviä illärenä dä signal taralaçaq. «Tatar yañalıqları» gäziteneñ baş möxärrir urınbasarı Ala Sabirova da çığış yasadı. Ul «Tatarskie novosti» gäziteneñ tirajı arta, finans xäle dä nıqlı, dip söyläde. Orenburda çığuçı tatar gäzite baş möxärrire Fännur Ğaysarov, aqça yuqlığına zarlandı häm Tatarstannıñ yärdämen soradı. Berlin tatarları isä keşedän yärdäm soramıy, üz köçlär belän gäzit çığara. Andağı tatarlar isemennän Venera Gerasimoff çığış yasadı. Ul, küptän tügel genä, Almaniä tatarları «Attabaş» digän gäzit çığara başlağannar, häm Venera xanım äytkänçä, tatar, urıs häm alman telendä çığuçı älege gäzit Evropa buylap tarala.
Utırışta tağın «Tatar-inform» ağentlığı wäkilläre dä çığış yasadı, alar barlıq xäbärçelärne xezmättäşlekkä çaqırdı, agentlıqnıñ tatar dönyası turındağı xäbärlärenä yazılırğa çaqırdı. Komissiä utırışınıñ axırında anda qatnaşuçılar rezolyutsiä qabul itte. Anda, matbuğat çaraların finanslawnı sorarğa, yäşlär turında kübräk yazu, «Yaña ğasır» kanalın tatarlar yäşägän töbäklärdä taratu, tatar gäzit jurnalların Rusiä töbäklärenä waqıtında tapşıru öçen çaralar kürü, bilgele şäxeslär turında kitap çığaru häm başqa täqdimnär kertelde.
Bikä Timerova.
