Respublikada soñğı aralarda mäğärif ölkäsen reformalaw bara. 2004 yılnıñ avgust ayınnan Tatarstanda älege ölkäne Räis Şäyxleslamov citäkli başladı. Sentäberdän başlap isä respublikanıñ Mäğärif ministrlığı Fän häm mäğärif ministrlığına üzgärtelde. 2004 yılnıñ soñğı könnärendä bu ölkädä tağın ber qızıqlı waqiğa buldı. 30 dekaber könne ministrı Räis Şäyxleslamov respublikanıñ uqıtuçılar belemen kütärü häm yañadan äzerläw institutı kollektivına yaña rektor täqdim itelde. Küp yıllar älege institutnıñ rektor wazifasın uñışlı ğına başqarğan täcribäle pedagog, professor Räşit İslamşin wazifasınnan kitü säbäple anıñ urınına Bötendönya tatar kongressında eşlägän İlsur Hadiullin kilde. Tatar kongressı Başqarma komitetı räise urınbasarı wazifasın başqarır aldınnan İlsur Hadiullin Mäğärif ministrınıñ urınbasarı bulıp eşlägän keşe. Şuña da, ul mäğärif ölkäsendä çit keşe tügel. Ölkäneñ bar problemaları, awır yaqları da aña tanış.
Yaña rektornı täqdim itü institutnıñ Ğilmi şura utırışında uzdı. Anda Mäğärif ministrı Räis Şäyxleslamov ta kilgän ide. Uzğan yıldağı eşçänlek xaqında Räşit İslamşinnıñ xisabın tıñlağaç, xezmätkärlärgä ministr yaña citäkçene täqdim itte. Şunısın da äytergä kiräk. Anıñ kem bulasın soñğı minutlarğa qädär diärlek belüçe bulmadı. Cıyılışnıñ bu öleşe bik matur häm cılı ütte. Anda üz eşläre belän institut xezmätkärläre arasında ğına tügel, ä böten respublika uqıtuçıları arasında zur abruy qazanğan Räşit İslamşinnı räxmät süzläre äytep, küz yäşläre belän ozattılar.
İlsur Hadiullin isä üzeneñ çığışında uqıtuçısı Räşit İslamşinğa räxmätlären citkerde häm anıñ eşen däwam itäçäge xaqında äytte. Şulay itep, Tatarstannıñ mäğärif xezmätkärläreneñ belemen kütärü institutı yaña yılğa yaña citäkçe belän kerde.
Gölnaz İlgizär
