Älmättä ütkän qarşılıq çaraları turında bezneñ xäbärçelär söyläde inde. Qazandağı ölkännärneñ uram cıyınnarına çıqmadı äle. Küpçelek pensionerlar taşlama urınına aqçalata yärdämne alğan, dip xäbär itä räsmi xäbärlär. Ämma transport çaralarında ölkännär häm bilet tikşerüçelär arasında tartqalaş ğädäti xälgä äylänä bara. Älmättäge qarşılıq çaralarına Qazandağı ölkännär dä teläktäşlek kürsätäme? Ölkännärneñ xälläre Yaña yıl başlanğannan soñ üzgärdeme? Bu xaqta Qazandağı pensioner apa Sania xanım Säläxova belän söyläşäbez. «Üzem käğäzlär artınnan yörmädem, ber nindi östämä aqça almıym. Min äle eşlim. Xoday isänlek birä. Başqalar bik ğazaplana, kiçä tramvayda ber äbine aqçası bulmaw säbäple, tramvaydan quyıp çığara başladılar. Üzem tülädem anıñ öçen. Äğär oyıştıruçısı bulsa, Qazandağı pensionerlar da uramğa çığar ide.»
Bu qazandağı pensioner xanım Saniä Säläxova fikerläre ide. Qazandağı ölkännär arasında taşlamalarr urınına açqa ala başlaw belän qänäğät bulğannar da bar. Şundıy keşelärne räsmi mäğlümat çaraları kürsätä. Sotsial tä`eminat bülekçälärendä qaynar telefon liniäse eşli. Anda şaltıratıp belgeçlärgä soraw birep bula. Aqça birü tärtibe turında mäğlümat haman da citmi, beleşmälär birüçe cawaplı keşelärgä könenä 100 keşe şaltırata ikän. Xökümät birgän mäğlümatlarğa qarağanda, elek transport oyışmalarına däwlät 450 million sum küçergän bulsa, xäzer şul uq transport xaqların pensionerlarğa 750 meñ itep öläşkän. Tağın nindi taşlamağa,küpme açqa tieş, pensiä çınlıqta küpmegä arta? Bu xaqtağı söyläşüne «Azatlıq»nıñ aldağı tapşırularında da äle däwam itärbez.Bikä Timerova.
