Qazan xakimiäteneñ şähärneñ çiklären kiñäytep, anıñ mäydanın zuraytu niätläre turında bez sezgä inde xäbär itkän idek. Qazannıñ xäzerge mäydanı belän çağıştırğanda yaña cirlär östälgäç, anıñ mäydanı ike märtäbägä artırğa tieş ide. Citäkçelär plannarına qarağanda, respublikanıñ Layış, Yäşel Üzän, Piträç, Yuğarı Oslan, Biyektaw rayonnarınıñ Qazan yanındağı cirläre şähärgä quşılır, dip uylanğan bulğan. Monıñ öçen 2005 yılnıñ 1 fevralenä qädär älege awıl, bistälärdä añlatu eşläre alıp barılırğa, anda yäşäwçe xalıqnıñ cıyılışları uzdırırğa digän qarar qabul itelgän bulğan şähär xakimiätendä. Mondıy cıyılışlar qayber cirlärdä inde ütte dä.
14 ğinwar könne Piträç rayonınıñ Bogorodskiy cirle üzidaräse Köyek awılında tirä-yündäge xalıqnı cıyıp, Qazanğa quşılunıñ kiräklegen añlattı. Annan kilgän mäğlümätlärgä qarağanda, andağı xalıq qazanlılarğa äylänergä qarşı kilmägän häm rizasızlıq kürsätmiçä genä tawış birgän. Ä menä Biyektaw rayonınıñ Konstantinovka bistäse xalqın Qazannan kilgän wäkillär şähär xalqı bulırğa ügetli almağannar. 15 ğinwarda uzğan cıyılışta Konstantinovka xalqı şähärgä quşılırğa üz rizalığın birmägän. Älbättä, şähär xalqı bulunıñ uñay yaqları bar. Qazan xakimiätennän kilüçelär cıyılğan xalıqqa telefon kertü, su uzdırğıçlar, yul tözü, elektr belän tä’min itüne kamilläşterü, avtobuslar cibärü kebek ğämällär wäğdä itkän. Läkin awıl keşese bulunıñ da üz caylı yaqları bar ikän. Cir öçen salım awılda äzräk, maşinalı keşelär öçen avtomobil iminiäteneñ bäyäse dä şähärgä qarağanda küpkä arzanraq, üz problemalarıñ belän qalağa barıp yörü urınına cirle üzidarägä kerep, alarnı xäl itü dä şaqtıyğa ciñelräk. Yäşel Üzän rayonınıñ Osinovo cirle üzidaräse citäkçese Rafail Ğabdraxmanov şulay dip uylıy. Citmäsä, wäğdä itelgän uñaylıqlar eşlänerme, yuqmı – belmägän. Mäsälän, inde 6 yıl elek Qazanğa quşılğan Voznesenie awılı xalqı xäzerge köngä qädär äybät yullarğa da, telefon kertü mömkinlegenä dä, başqa şähär uñaylıqlarına da iä tügel. Şuña da, keşelär Qazanğa quşılırğa rizalaşırğa aşıqmıylar.
Şulay uq Qazanğa quşılu mäs’äläsendä cıyılışlar başqa awıllarda da bulırğa tieş ide. Läkin, Qazan xakimiäte kilep tuğan qıyınlıqlarnı istä totıp, älegä bu eş belän aşıqmasqa bulğan. Rafail Ğabdraxmanov süzlärenä qarağanda, Osinovo bistäsendä 21 ğinwarda bulırğa tieşle dip planlaştırılğan xalıq cıyınınıñ ütü-ütmäwe turında älege bernindi dä açıqlıq yuq. Şulay itep, Qazannıñ yaña çikläre inde mart axırına qanuni räweştä bilgelänäçäk dip uylanğan bulsa da, çınbarlıqta bu eşneñ planlaştırılğan waqıtta betüe şähär xakimiäte wäkillärendä xäzer şik tudıra başladı.
Gölnaz İlgizär
