Rizaeddin Fäxretdinneñ pedagogik uquları 2005 yılda ikençe tapqır oyıştırıla. Uzğan yıl ul Tübän Qama şähärendä uzğan ide. Rizaeddin Fäxretdin icatın öyrängän Änwär Xäyrullin äytkänçä, bu uqular inde traditsiägä äylänep bara. Kiläse yılnı uqularnı Rizaeddin Fäxretdinneñ tuğan awılında Älmätneñ Kiçü Çatı awılında oyıştırırğa niätlilär. Mäğrifätçe, mäşhür tatar ğalime Rizaeddin Fäxretdinneñ xezmätläre ğilem birügä, ädäp-äxläkqa, tärbiägä bağışlanğan. Anıñ xezmätläre oktäber inqilabına qadar barlıq tatar mädräsälärendä tärtip, ädäp, äxlaq, etika, estetika däreslärendä qullanılğan. Änwär Xäyrullin fikerençä, Rizaeddin Fäxretdin kitapları uqıtuçılar eş itärgä tieşle metodik kürsätmä bulıp tora. Çönki ul pedagogikanı tirän belgän. Alarda qız bala, ir bala tärbiäläw, ğailäneñ, ata-analarnıñ nindi bulırğa tieşlege bäyenä-bäynä yazılğan.
Tatarstan Respublikası Mäğärif häm fän ministrlığınıñ milli bülege dä älege uqularnı Rizaeddin Fäxretdin mirasın barlaw häm anı uqıtu-tärbiä protsessında faydalanu maqsatınnan oyıştıra. Bıyılğı uqularnıñ Leninogorskinıñ Tübän Çırşılıda uzuı yuqqa tügel, çönki Rizaeddin Fäxretdinne tirä yaqtan iñ zur bulğan älege mädräsädä un yıl buyı belem ala. Häm xezmät eşçänlegen dä şunnan başlıy.
Tübän Çırşılıda uzğan uqular turında Änwär Xäyrullin “Azatlıq” radiosına bolay dide
Pedagogik uqularda respublika rayonnarınnan kilgän uqıtuçılar qatnaşıp, Rizaeddin Fäxretdinneñ xezmäten üz eşlärendä faydalanuları turında söylädelär. Annarı uqular R. Fäxretdinov muzeenda däwa itte.Änwär Xäyrullin Rizaeddin Fäxretdinneñ "Äxlaq ğileme" seriäsendä çıqqan 11 kitabın kiril şriftına küçergän häm tärcemä itkän. Uzğan yıl milli "Mäğärif" näşriätında anıñ "Näsıyxät" isemle öç kitabı tuplanıp çıqtı. Bu kitapnıñ berençese - ir balalarnı äxlaqi häm ruxi tärbiäläwgä. İkençese qız balalarnı tärbiäläwgä, üz-üzlären totu qağidälärenä öyrätä. Öçençese isä zurlarnı äxlaqi häm ruxi tärbiäläwgä bağışlanğan. Änwär Xäyrullin kiläçäktä Rizaeddin Fäxretdinneñ “Ğailä” kitabın tuplap, anı ZAGSlarğa, yaña ğailä qorıp cibärüçelärgä birergä xıyallana. Ğomumän ul anıñ dini, tarixi, pedagogik xezmätläreneñ barısın da dönyağa qaytarırğa uylıy. Anıñ balalarğa belem birügä bağışlanğan ğilem turındağı kitaplarına ayırım basım yasıy.
1997 yılda Törkiädäge Äxmät Mäñgär fondı Rizaeddin Fäxretdinneñ “Bolğar wä Qazan törekläre” xezmäten latin älifbasında çığarğan ide. Älege kitapnı Qazannıñ 1000 yıllığına da bastırıp qunaqlarğa taratu niäte bar.
Landış Xarrasova
