Tatar internetı äkren genä üsep barsa da, çeltärdä, forumarda barıber tatarça bik az söyläşälär. Moña tatarça komputer programmalarınıñ bik az buluı qomaçaw itä dip, farazlarğa bula. Tatarstan elemtä ministrlığı xäbär itkänçä, «Microsoft» häm «Linux» programmaları tatarça bulaçaq ikän. Respublikada şundıy proyekt eşlänä. Bu xaqta jurnalistlarğa elemtä ministrı urınbasarı Färit Fazılcanov xäbär itkän. Süz «Microsoft» häm «Linux» kebek iñ ere kompyuter şirkätläre turında bara. Bu eşne İnformatika problemaları institutı häm Tel, ädäbiät, sänğät institutları belgeçläre dä eşli. «Microsoft»nıñ töp Office programmaların tatarça eşlätep cibärü inde bik küptännän başlağan ide. Ämma başlanğıçnıñ näticäse haman da kürenmäde. İnde xäzer älege proyektta küpmeder alğa kiteş barlığı turında äytep bula. Bez, İnformatika problemaları İnstitutı başlığı Zinovyev Pavel belän söyläşep, küpmeder yaña mäğlümat beldek. Elegräk institutnıñ «Windows»nı tatarçalaştıru eşen alıp barırğa aqçası bulmağan. Ä xäzer bu ölkädä xäl üzgärgän. Moña qädär süz «Microsoft» turında ğına barsa, xäzer «Linux» programmalarınıñ da tatarçası barlıqqa kilergä mömkin. Näq şuşı könnärdä, Elemtä ministrı urınbasarı Färit Fazılcanov "ALT Linux" şirkäte belän xezmättäşlek turında kileşü tözü turında söyläşülär alıp bara. Xäbärlärdä äytelgänçä, ägär bu proyekt kilep çıqsa, iñ yış qullana torğan tatarça kompyuter programmaları Qazannıñ 1000 yıllıq bäyrämenä äzer bulaçaq ikän. Elemtä ministrı urınbasarı Färit Fazılcanov süzlärençä, bu proyekt - tatarlarnı berdäm mäğlümäti tirälekkä cälep itü ısulı. Annan soñ İnternetqa tatar teleneñ nıqlabraq ütep kerüen dä kötärgä ozaq qalmas. Ämma belgeçlär, kompyuter programmaların älegä kurilça tatarçağa küçerergä cıyına. İnformatika institutı citäkçese Pavel Zinovyev äytkänçä, alar räsmi qabul itelgän älifba belän genä eş itä ala.
Bikä Timerova.
