Accessibility links

Qazanlılar mitinglarğa yörmi başladı


Şimbä, 22 ğinwar könne Qazannıñ Ğäliäskär Kamal teatrı binası yanında taşlamalarnı aqçalata tüläwlärgä alıştıruğa qarşı miting uzdı. Läkin bu yulı ul başqaları kebek qanunsız räweştä oyıştırılmağan ide. Oyıştıruçılar anı böten şartların kiterep, Qazan şähäre xakimiäte röxsäten alğannan soñ uzdırdı. Xäyer, bu yulı da oyıştıruçılar şul uq – Eşçelär kontrole komitetı, Tatar ictimaği üzäge. Mitingta qaynar çığışlar yasawçılar arasında Kommunistlar firkäse wäkilläre buldı. Mäsälän, tribunada, annarı xalıq arasında tatarstan Däwlät Şurası deputatı Näsimä Stolyarova kürende. Älege mitingka inde küptännän äzerlänep, aña çaqırular här qarşılıq aksiäse sayın iğlan itelsä dä, xalıq ällä nu küp bulmadı. Rusiäneñ Novosti mäğlümät agentlığı Qazanda 200 keşe cıyıldı, dip xäbär itsä dä, çınlıqta isä teatr yanındağı xalıqnıñ sanı 50-60tan ällä ni artmadı. Atna urtasında respublika xökümäteneñ pensionerlarğa ay axırına qädär transportta buşlay yörergä röxsät itüe, annarı kompensatsiä bäyäsenä maxsus yörü biletları taratılu turındağı xäbär qazanlılarnıñ mitinglarğa yörergä telägen kimetkän, küräseñ. Citmäsä, hawa torışı da uramda ällä ni ozaq toru niäten sündererlek ide 22 ğinwar könne. Bigräk tä, olı keşelärneken. Qış urtası öçen şaqtıy cılı torğan könnär, şimbädä kinät kenä –15 däräcägä qädär suıtıp cibärde. Tribuna yanında elengän transportta yörü, toraq-kommunal tüläwlärgä taşlamalarnı qaytaru xaqındağı berniçä şiğär arasında Qazannıñ meñyıllığın Kamil İsxaqovsız ütkärik digäne dä kürende.

Oyıştıruçılar bez mitingka olılarnı ğına tügel, taşlamaları beterelgän mäktäp häm yuğarı uqu yortları uquçıların da alıp kiläbez, dip niätläsä dä, şimbä könne uzğan cıyında da küpçelekne pensiä yäşendäge abıy-apalar täşkil itte. Mitingtağı äbi-babaylar çığış yasawçılarnı ällä ni tıñlamıyça, kübräk üzara söyläşep, moñ-zarları belän urtaqlaştı. Şulay itep, şimbä, 22 ğinwar könne Qazanda taşlamalarnı beterügä qarşı uzğan miting bik ozaq äzerlänsä dä, xalıqnı aldağı könnärgä qarağanda da, azraq cıydı häm bik tınıç ütte.

Gölnaz İlgizär

XS
SM
MD
LG