Blokada 27 ğinwar - leningradlılar öçen iñ izge kön, ciñü köne. 61 yıl elek, 1944 yılnıñ 27 ğinwarında 900 kön häm 900 tön däwamında barğan mäxşärgä çik quyıla- şähärne äyländerep alğan doşman bocrası özelä. Ämma bu ciñüneñ bäyäse - açtan ülgän millionnan artıq blokadnik ğömere, tözälmäs küñel yaraları, cuyılmas xatirälär. 90 yäşen tutırıp kilüçe Arifä äbi Bekyäşeva suğış başlanğanda "Krasnoe znamya" fabrikasında eşlägän bula, fabrikadan anı Krasnoe Selo tiräsenä okop qazırğa cibärälär. Annan blokada, açlıq, gospitaldä sanitarka bulıp eşläw. Arifäneñ dä, ire Carullanıñ da küp sanlı tuğannarı Piskarevkada, Serafimovskiy ziratında-tuğannar qäberlegendä. Arifä äbineñ üzenä başqa açlıqtan qurqu toyğısı, azıqqa, ikmäkkä ayıruça xörmät belän qarawı blokada waqıtınnan qalğandır ul. Arifä Bekyäşevanıñ istälekläre pänceşämbedä "Azatlıq" dulqınnarında.
Gölzada Kamalova, Peterbur
