Qazan şähäre xakimiäte xezmätkärläre jurnalistlar belän bergä çärşämbe könne başqalada tözelep kilüçe metroda yörde. Xäyer, Qazanda metro inde qullanılışqa tapşırılğan ikän diärgä irtäräk. Älege transportnı safqa quyar öçen şaqtıy eş başqarası bar. Läkin metronıñ qayber öleşläre inde äzer diärlek. Härxäldä, şähär citäkçelärenä, kilgän qunaqlarğa tanıştıru yöreşen uzdıru öçen. Başqalarğa isä, metroda yörü mömkinlegen Qazannıñ meñyıllığına qädär kötärgä turı kiläçäk.
2 fevral’ könne Tatarstannıñ Däwlät Şurası räise Färit Möxämmätşin Hollandiädä ütä torğan cirle üzidarä mäs’älälärenä bağışlanğan xalıqara cıyılışta qatnaştı. Möxämmätşin anda Tatarstan wäkile bularaq qına tügel, ä Evropa Şurasınıñ cirle xakimiätlär komitetı citäkçese räweşendä dä buldı. Ä menä Qazannıñ boralaqlar şirkäte wäkilläre Hindstan häm Ğäräp Ämirleklärenä cıyına. Alar anda ütäçäk xalıqara aviakürgäzmälärdä üzläreneñ yaña produktsiäsen täqdim itärgä cıyına. Sişämbe könne Tatarstannıñ salım xezmäte wäkilläre 2004 yılnıñ näticäläre belän tanıştırdı. Rusiä salım ministrlığınıñ respublika idäräse citäkçese Rinat Xayrov süzlärenä qarağanda, bıltır 94 milliard sumnan artıq salım cıyılıp alınğan. Şuşı aqçalarnıñ yartısı – 48 milliard sum federal’ qaznağa kitkän, 30 protsentı – respublika öleşenä tigän, qalğanı isä – cirle byudjetlarğa qalğan. Respublikanıñ iñ ere salım tüläwçelär bulıp Tatneft’, Nijnekamskneftexim, Tatenergo, Tatspirtprom kebek zur şirkätlär tora.
2 fevral’ respublika tarixına şaqtıy qızıqlı ber waqiğa belän kerep qalğan. 1918 yılnı näq menä şuşı könne Mäskäwdä Vladimir Ulyanov-Lenin millättäşlärebez Ğälimcan İbrahimov häm Mullanur Waxitov belän oçraşqan. Anda milli häm säyäsi mäs’älälärne tikşergändä süz Söyembikä manarası turında da barğan.
Qazanda tuplı xokkey buyınça XXV dönya çempionatı däwam itä. Anda inde öçençe uyında rättän ciñep Rusiä komandası berençe urında bara. 1 fevral’ könne Rusiä xokkeyçıları Norvegiä komandasın 22/0 xisabı belän ciñdelär. Ä mäğlümät çaraları isä, şuşındıy zur xisap belän ciñelgän Norvegiä uyınçılarınıñ usal uyını, bozda häm annan tış tärtip bozuları turında söyläde. Çempionatta ikençe urında älegä Şvetsiä komandası bara. 3 fevral’ könne isä uyınnar bulmıy, bäygedä bu kön yal köne itep iğlan itelgän. Şulay uq respublikada tennis buyınça Qazan kremle kubogına yarışlar da däwam itä. Xäyer, dönya çempionatı barğanda älege yarışlarğa iğtibar ällä ni zur tügel.
Gölnaz İlgizär
