Accessibility links

Кайнар хәбәр

Azatlıq radiosı Ana tele köne uñayınnan bäyge iğlan itä


Belgänegezçä, Tatarstanda fevral’ – Ana tele aylığı dip iğlan itelde. İsegezgä töşerep ütäbez, älege çara 21 fevral’dä bilgeläp ütelä torğan Ana tele köne uñayınnan uzdırıla. Aylıq qısalarında tellärgä, bigräk tä tatar häm rus tellärenä bäyle törle çaralar ütkärelü qaralğan. Mäsälän, Tel häm ädäbiät institutında ğalimnärneñ cämäğätçelek wäkilläre belän oçraşuı, Çallıda tel mäs’älälärenä bağışlanğan fänni-ğämäli konferensiä uzdıru, kitapxanälärdä kürgäzmälär, tügäräk östäl utırışları oyıştıru, mäktäplärdä, yuğarı uqu yortlarında uquçılar öçen yazuçılar, tel belgeçläre belän qızıqlı oçraşular ütkärü qaralğan. Şulay uq Ana tele aylığı barışında, Tatarstan-Yaña ğasır kanalınıñ Mädäniät dönyasında programmasınıñ ber çığarılışın da tellär mäs’äläsenä bağışlaw planlaştırıla. Bu xaqta bezgä respublika Ministrlar Kabinetınıñ Tellärne üsterü bülegendä xäbär ittelär.

Bu çaralar, alarnıñ barışı, ğomumän, Tatarstanda tellär mäs’äläseneñ torışı belän bez sezne äle tanıştırırbız. Bügen isä Azatlıq radiosınıñ Ana tele köne uñayınnan ütkärergä telägän ber çara turında. Bez tıñlawçılarıbız arasında tatar telen iñ äybät belüçe, iñ yaxşı tärcemäse isemenä bäyge iğlan itärgä buldıq. Bügen bez sezgä äytkän berniçä urısça süzne tatarçağa tärcemä itep, sez, xörmätle tıñlawçılar, alarnı bezgä xäbär itä alasız. Cawaplarnı elektron häm ğadi poçta aşa yazıp cibärergä, şaltıratıp äytergä mömkin. Adres häm telefonnarıbıznı bez sezgä yazmanıñ axırında iskä töşererbez. Ä älegä – tärcemä itärgä kiräkle süzlär.

СВЕЖИЙ, ЗАПАС, ФАЛЬСИФИКАЦИЯ, МЕНЕДЖЕР, ЗАЛОГ, ВЕРТОЛЕТ

Şulay itep, bäygedä qatnaşırğa teläwçelär, xäzer äytelgän süzlärne tatar telenä tärcemä itep, Azatlıq radiosınıñ Qazan byurosına xäbär itärgä tieş. Bezneñ elektron adresıbız – azatliq@azatliq.ru. Poçta adresı – 420012 Qazan-12, 155 abonent tartması. Telefonıbız – 368102. Bez bäygedä qatnaşırğa teläwçelärneñ cawapların kötep qalabız.

Gölnaz İlgizär

XS
SM
MD
LG