Accessibility links

Кайнар хәбәр

Kamal teatrı Ufağa icadi säfärgä kilä


Ğäliäsğar Kamal isemendäge Tatar däwlät aqädemiä drama teatrı tizdän Başqortstanğa icadi säfärgä kilä. Bu yulı kamallılar Ufanıñ Respublik urıs drama teatrı binasında çığış yasıy. Ğastrol'lär 15 fevräldän 28 fevrälgä qädär däwam itäçäk. Şul uq könnärdä Ufadağı urıs drama teatrı kiresençä Qazanda Kamal teatrı binasında üz spektäkllären kürsätäçäk.

Kamal teatrınıñ Ufadağı çığışları başlanır aldınnan, Başqortstanğa teatrnıñ direktorı Şamil Zaqirov häm anıñ urınbasarı İnsaf Xämitov kilde. 4 fevräl könne alar Başqortstan jurnalistları öçen matbuğat oçraşuı oyıştırdı häm bulaçaq ğastrol'lär xaqında baytaq qına mäğlümatlar birde. Kamal teatrı direktorı Şamil Zaqirov äytüençä, bu yulı danlıqlı teatr kollektiwı Başqortstan tamaşaçısına 8 spektäkl täqdim itä. Menä alar: «Telsez küke», «Şulay buldı şul», «Yara», «Xanuma», «Qazan sölgese», «Kiçer mine änkäy», «Äldermeştän Älmändär» häm «Yawa qarlar, yawa qarlar» spektäklläre. Kamal teatrı kollektiwı, başqa kilülärendäge kebek ük, Ufağa yaqın urnaşqan rayonnarğa barıp ta çığış yasarğa cıyına. Şulay uq Qazan artistları Ufada törle qızıqlı oçraşular oyıştırunı da küz uñında tota. Mäcit Ğafurıy isemendäge Başqort däwlät aqädemiä drama teatrı artistları belän oçraşu da şular isäbennän.

Şulay itep tögäl un könnän Ğäliäsğar Kamal isemendäge Tatar däwlät aqädemiä drama teatrı sänğätkärläre Başqortstan başqalasına çın bäyräm alıp kilä. Danlıqlı teatr belän ike yıl küreşmägännän soñ, Ufa tamaşaçıları kamallılarnı bik sağınğan küräseñ, spektäkllärgä biletlarnı sıdırıp alalar, di.

Fänis Fätxi, Ufa.
XS
SM
MD
LG