Bu bäyge çärşämbe könne 16 fevral'dä Tatar däwlät filarmoniäseneñ konsertlar zalında teatral'läşterelgän küreneş belän açılıp kitte. 2005 yıl “ Tatar cırı-2004”estrada konkursı belän başlanıp kitkän ide. Uzğan yılda radio- televideniedä barğan konkursqa, 12-16 ğinwar könnärendä näticä yasaldı. Cırçılarğa “Altın bars” büläge tapşırıldı. Ul bäyge turında bäxäslär dä zurdan buldı. Bik küp estradağa omtılğan yäşlär aña yaxşı mönäsäbättä qalsa da, ölkän yäştägelär tarafınnan küp kenä tänqit süzläre dä yañğıradı. Şulay bulsa da, zaman qanunnarına buysınıp, kommersiä qısalarında eş alıp barğan “Bars- Media” kompaniäse şou-biznestağı cırçılarnı, alarnı öleşçä üze äzerläp qatnaştırğan ide. Ä bu bäyge Mädäniät ministrlığı, Ğ. Tuqay isemendäge Tатар däwlät filarmoniäse, ”Yaña ğasır”teleradio kоmpaniäse, BTK BK tarafınnan oyıştırılğan . Ul Qazan şähärenä 1000 yıllığı uñayınnan häm İlham Şakirovnıñ 70 yäşlek yubileyına bağışlap iğlan itelde. Bäygedä qatnaşuçılar turında jyuri äğzası kompozitor Rezeda Äxiärova menä närsälär äytte. “ Bik matur tawışlı yäşlärneñ SD, KD larda yazılğan cırların tıñladıq. Awıllarda yäki , şähärlärdä yäşägän cırğa talantı bulğan , ämma ata-anaları yärdäm itä almağan yäşlärgä, cırlarnı yazdırır öçen yärdäm itüçe berär üzäk kiräk”,- dide ul. Ä menä çärşämbe könne Tatar cırın başqaruçılarnıñ İlham Şakirov isemendäge İkençe xalıqara konkurs bäygeseneñ II turı Ğ.Tuqay isemendäge Tatar däwlät filarmoniäseneñ konsertlar zalında tantanalı räweştä teatral'läşterelgän küreneş belän açılıp kitte. Anda Tatar cırın başqaruçılarnıñ İlham Şakirov isemendäge I Xalıqara bäygeseneñ laureatları İldar Xakimov , İlüs Ğilmanşinnar çığış yasadı. İlham Şakirov üze dä aña ğına xas moñlı tawışı belän yaratqan tamaşaçısın şatlandırdı, häm alarnıñ alqışlarına kümelde. Tantananıñ berençe bülegendä jyuri äğzaları İdris Ğaziev, Venera Ğaniewa, Salawat Fätxetdinov kebek cırçılar qatnaşsa, kiçäneñ ikençe bülegendä Asaf Valeev, Rezeda Ğalimova, Färidä –Alsu, Röstäm Zakirov, Alsu Äbelxanova, İlsaf kebek cırçılar qatnaştı. 17-18 fevral' könnärendä baraçaq bäygedä 50 dän artıq Rusiä, Tatarstan töbäklärennän bulğan cırçılar qatnaşa. Bu bäygeneñ üzençälege şunda: Anda qatnaşuçı cırçılar , İske qara urman, Gölcamal, Täftiläw, Uyıl, Bödrä tal, Ällüki, Sibelä çäçäk kebek tatar cırlarınıñ ozın köylären muzıka yärdämennän tış , yäğni a`kapella, başqarırğa tieş. İkençe cır- tatar kompozitorlarınıñ äsäre bulu zarur. Ä cırnıñ öçençese –İlham Şakirov repertuarınnan bulırğa tieş. 19 fevral'dä bäygeneñ III turı uzaçaq. Aña ütkän cırçılar öçençe cır itep üzläre saylağan ber cırın başqaraçaqlar. 20 fevral'dä Ğ. Tuqay isemendäge TDF KZda Gala- konsert bulaçaq. Şulay itep Tatar däwlät filarmoniäse konsertlar zalında tatar xalıq cırınıñ ozın köylären, folk'lor cırların işetäse kilgän tamaşaçı alarnı tıñlap telägenä ireşä ala.
Ä 21 fevral'dä tantanalı räweştä bäygeneñ yomğaqlaw konsertı Sara Sadıyqova isemendäge Zur konsert zalında ütäçäk.
Azatlıq radiosı Mälikä Basıyr, Qazan.
