Watannı saqlawçılar köne uñayınnan Omskida törle bäyräm çaraları küpkä aldan başlandı. Çaralarnıñ ölkä külämendä ütkärelgännäreneñ iñ möhime 22 fevral''dä Ciñü Parkında häykäl açu buldgandır. Soñğı, tınıç dip sanalğan yıllarda xärbi konfliktlarda häläk bulğannar häm isän-imin äylänep qaytqannar istälegenä biredä mähabät memorial kompleks tözelde. Anı açu tantanasında ölkä häm şähär citäkçelege, studentlar,balalar, soldatlar, kadetlar, şähär cämäğätçelege häm başqalar qatnaştı. Tantanada çığış yasawçılar, bu monument törle suğışlar soldatların, araları 10-ar yıl bulğan buınnarnı berläşterde, waqıtında alar suğışqa cibärüçelär xaqlımı, dip soramadılar, burıçların ütädelär, - dip assızıqladılar. Mondıy çaranıñ yäşlär öçen zarurlığına basım yasadılar.
Häykäl açu tantanasında bu soñğı suğışlarda ulların yuğaltqan ata-analar da az bulmadı. Gölfiä apa häm Säwçät abıy Mösäğitovlarnıñ ulları Feliks Avgan suğışında häläk bulğan. Bezgä Avganstan digän süzne genä dä işetü awır, didelär alar. Şulay da Gölfiä apa belän Säwçät abıy Watannı saqlawçılar köne aldınnan tatar milli-mädäni moxtariäte oyıştırğan xäter kiçäsenä kilgän idelär. Avganstan afäten kiçerüçelärdän tış Böek Ciñüneñ 60 yıllığına bağışlanğan bu kiçägä suğış häm tıl veterannarı, tatar millätennän bulğan kadetlar häm Armiä saflarında xezmät itüçe soldatlar çaqırıldı. Küpläre 80 yäşlären tutırğan olpat veterannarnıñ xatirälären hämmäse qızıqsınıp tıñladı.
Sovetlar Soyuzı qaharmanı Ğafar Nazar ulı Nasardinov turında istälekläre belän anıñ kilene Lälä xanım Nasardinova urtaqlaştı.
Ğafar abıy Nasardinov 1992 yılda wafat bula. Böyek Watan suğışında Omski ölkäsendä tuıp üskän 4 tatar keşese Sovetlar Soyuzı qaharmanı isemenä layık bula. Qızğanıçqa, bügenge köndä alarnıñ berse dä arabızda yuq inde.
Kiçä barışında suğış qorbannarı xörmätenä tınlıq minutı, doğa qılu yolaları ütälde. “Umırzaya” ansamble cırçıları suğış, tınıçlıq temasına cırlar başqardılar.
Kiçägä kilgän kadetlar qısqaça üzläre turında söylädelär, aldağı plannarı belän urtaqlaştılar.Kadetlar korpusında uquçı yegetlär asılda ätiläreneñ, babalarınıñ eşen däwam itsälär, kiçägä kilgän soldatlar Omskiğa xärbi xezmät ütü öçen cibärelgännär. Yegetlär-Nail Moxtarov häm Azamat Kärimov, biredä inde ike yılğa yaqın xezmät itälär, armiägä Orenburdan häm Başqortstannan çaqırılğannar. Alar tatarça matur ğına çığış yasadılar, kiçäne oyıştıruçı apalarınıñ sorawı buyınça qıyınsınıp qına bulsa da cırlap ta birdelär.
Şunısı da äytep ütärgä kiräk, tuğan telneñ bügenge köndä betep baruına qarata borçuların da belderdelär kiçädä qatnaşqan ölkännärebez, yäşlärgä üget-näsixätlären dä birdelär, izge teläklären dä yulladılar.
Rozaliä Sayganova, Omski
