Fevral'neñ soñğı atnasında tatar telendä çığa torğan jurnallarnıñ ikençe - fevral' sannarı kürenä başladı. İñ berençelärdän bulıp tağın “Qazan utları” jurnalı päydä buldı. Anda uquçını bik tä qızıqsındırğan häm ul anı kötep alğan “Sez belämsez qaya barğannı” dip atalğan yazmanıñ däwamı birelgän. “Qazan utları” jurnalında 2004 yıldan başlanğan häm bıyıl da däwam itkän “Bezneñ zaman geroe” säxifäsendäge bäxäskä qatnaşqan avtor uquçılarğa bik tanış yazuçı, şağir, publitsist , Tatarstan Yazuçılar berlegeneñ Ğayaz İsxaqi isemendäge premiäse lawreatı Aydar Xälim. Anıñ bu yazmasında bik küp yazuçılarğa , şağirlärgä anıñ ädäbi-tänqidi fikerläre äytelä. Qayber klassik yazuçılarnıñ , şağirlärneñ dä citeşsez yaqların, fikerläreneñ milli üseşkä täñgäl kilmägänlegen taba. Bolar, älbättä, bäxäs tudıra. Ä xäzer sezgä Aydar Xälimneñ yazmasınnan ber genä temağa bağışlanğan, ul da bulsa , tatar yazuçıları arasında , tatar intelligentsiäse arasında barlıq tatar millätendäge dissidentlıq mäsäläse turındağı fikerlären (yazmadan özeklärne) Damir Älmätle uqıp birä.
“Ägär bezdä , tatarda yähüdtäge , xoxoldağı, läxtäge, madyardağı, latıştağı h.b.ş.“dissidentlıq xäräkäte, ädäbiäte, tarixi monitorinğı bulğan bulsa, bezneñ millät anıñ yazuçıları, , zıyalıları, ädäbiät, mäğrifät häm mädäniät bügenge kebek qısıqta torıp qalmas, bez millätneñ faşist ambrazurasına quıp kertelgän mesken balasınnan “zaman qaharmanı” yasap yatmağan bulır idek.Ütkän ğasırnıñ illençe—altmışınçı yıllarına qädär sovet kontrrazvedkasınıñ iñ “yawız” doşmannarı bulıp isäplänep, tarixi Watanğa üzläreneñ barlığın sizderep kilgän Ğayaz İsxaqi, Sadri Maksudi, Arat häm başqalar bez küz aldında totqan qalıptağı dissidentlar tügel, ä emigrantlar ide. Ägär bezneñ milli dissidentlarıbız bulğan bulsa, alar SSSR tarqalğaç bezgä kire qaytqan emigrant İsxaqilar, Maksudilar mirası belän kire qaytqan häm bezneñ bügengebezne ber däräcä ciñeläytkän bulırlar ide. Ägär bezdä tirän tamırlı “dissident” ädäbiät bulğan bulsa, , bezneñ bügenge ädäbiät bu qädär yomşaq bulmas, doşmannar da bezneñ belän isäpläşkän bulırlar , bezneñ referendum aşa yawlap alğan möstäqillegebezne “vertikal'” buyınça peçep utırmas ide”,-dip yazğan yullar da bar Aydar Xälimneñ yazmasında. Sez , şağir , yazuçı , publitsist , Aydar Xälimneñ Qazan utları jurnalında “Bezneñ zaman geroe” dip atalğan säxifäsendä basılğan “ Sez belämsez qaya barğannı”dip atalğan yazmasınnan özeklär tıñladığız. Özeklärne Damir Älmätle uqıdı. Tapşırunı Mälikä Basıyr äzerläde.
Azatlıq radiosı, Qazan.