Accessibility links

Кайнар хәбәр

İtaliä Ğiraqta iminlek xezmäte wäkileneñ üterelüenä añlatma kötä


Italiäneñ tışqı eşlär ministrı Gianfranco Fini, Amerika Quşma Ştatlarına möräcäğät itep, comğa könne Ğiraqta italyan iminlek xezmäte wäkile Nicola Calipari'nıñ ülemen tikşerüne häm monıñ öçen cawaplı bulğan keşelärne cäzağa tarttırunı soradı. Mäğlüm bulğança comğa könne Calipari häm totqınlıqtan azat itelgän italyan jurnalistı Giuliana Sgrena utırğan maşinağa amerikan ğaskärläre ut açqan. Fini bügen parlament aldında yasağan çığışında, älege waqiğanıñ faciğa bulğanın tanuın belderde. Jurnalist xanımnıñ, amerikan köçläre belep ut açqan digän süzlären kire qağıp, bez Amerika Quşma Ştatlar belän berektäşlär, häm alar bezgä xezmättäşlek wağdä itte, dide: "Älbättä, bu faciğa ide. Säyer şartlarda bulğan faciğa. Ämma barıber, bu xällärgä açıqlıq kertergä kiräk. Añlaşılmağan äyberlärne añlatırğa kiräk, monıñ öçen cawaplı bulğannarnı tabırğa, häm şundıylar bulsa – alarnı cäzağa tarttırırğa kiräk," dide Fini. Calipari kiçä Rimda cirlände. Venadağı Xalıqara Matbuğat İnstitutı bügen yasağan belderüdä, Ğiraqta amerikan ğaskärläre tarafınnan jurnalistlarnıñ üterelü oçraqları yış buluı "borçılu tudıra" dielä. Oyışma citäkçese Johann Fritz süzlärenä qarağanda, amerikan xärbiläreneñ jurnalist Sgrena'nıñ azat itelüe häm maşinada Bağdad hawa alanına yul totuı turında belmäwläre – mömkin tügel ide, dide häm amerikan xärbi citäkçelegen – ğaskärlärneñ jurnalistlar belän aralaşu yulların tikşerergä çaqırdı.
XS
SM
MD
LG