Rusiädäge kiñ bilgele «Mejprombank» bankınıñ Ufadağı bülege comğa könne kiñküläm mäğlümat çaraları öçen ber belderü äzerläde. Anda älege banknıñ başqalanıñ Oktäbr prospektındağı ofisına şähär kommunal xucalığı xezmätkärläre tarafınnan qılınğan qanunsız ğämällär xaqında äytelä. «Şähär kommunal xucalığı aldan kisätüsez häm bernindi añlatmalar birmiçä, 10 martta bezneñ bank binasına cılılıq birüne tuqtattı, – dip äytelä bu belderüdä. – Bankqa şähärneñ su belän täemin itü qanalınnan häm elektr täeminätı idaräsennän dä wäkillär kilep kitte. Dimäk, aldağı könnärdä bankqa su häm elektr energiäse birü dä tuqtatılırğa mömkin».
«Mejprombank» idaräse citäkçeläre üzlärenä qarata başlanğan älege ğämällärne qanunsız dip tanıy häm monı 2003 yılda respublika prezidentlığına däğwa itkän Sergei Veremeyenkoğa qarata bulğan höcümnärneñ däwamı dip bäyäli. Banknıñ belderüendä Sergei Veremeyenkonıñ şuşı arada Ufada yaña bank bülegen açarğa cıyınuı xaqında äytep, «şähär xucalarınıñ qanığuına şuşı da säbäpçe bulırğa mömkin» dip belderelä. «Mejprombank» nıñ Ufadağı bülege xäzer üzen yaqlaw öçen, Başqortstan prokuraturasına ğarizä äzerli ikän.
