“Tatar yegete” bäygesendä Minzäläneñ törle awıllarınnan barlığı 7 yeget qatnaştı. Alar arasında mäktäp, uçilişçe, texnikum uquçıları bar ide. Bäyge “Tatar yegete” dip atalsa da, başlarına tübätäy, milli kiemnär kigän yegetlärgä säxnädä härdaim Minzäläneñ “Umırzaya” biyu ansamble qızları yärdäm itep tordı. Awıldan kilep berençe tapqır zur säxnägä çığu bilgele zur qıyulıq sorıy. Cırlağanda-biegändä yegetlär üzlären şaqtıy irken totsa da, söyläwgä kilgändä beraz qawşap qaldılar. Här yegetkä milli bäyräm, ğöref-ğadätlär turında söylärgä quşıldı. “Aulaq öy” xaqında yegetlärneñ berse “Anda elek qızlar belän yegetlär dönya xällären söyläşep utırğannar” dip zaldağı yäşlärgä bik qızıq toyıldı. Küräseñ awıldağı tatar yegetläre eşkä citez bulsa da süzgä saranraq.
Bäyge 8 öleştän tordı. Uñaysız xäldän çığu, yäğni “Tatarğa tılmaç kiräkmi”, “Ägär min soltan bulsam” digän bäygelär ayıruça küñelle buldı. Tatar yegetläreneñ zalda utırğan Minzälä rayonı xakimiät başlığın da çemetkäläp aluı zaldağı xalıqqa bik oşadı. Monnan tış yegetlärgä tiz apada pıçqı belän utın kisärgä, osta itep biergä kiräk buldı. Bäyge barışında yegetlärneñ qaysı qurayda uynadı, qaysı doğa uqıp kürsätte, qaysı başqort, tatar häm tağın bik küp milli iyüllärne osta itep başqardı. Här yegetneñ dä närsägä dä bulsa ostalığı bar ikäne kürende. Zalda utıruçı canatarlar r da härqaysı üz awılı yegete öçen borçılıp sızğırıp utırdı.
Bäygedä ber yeget tä büläksez qalmadı. I urınnı Tawastı Baylar awılı yegete - İlnur Gayniev aldı. II urınğa Minzälä pedagogiä kölliäte studentı - İlnaz İbrahimov layıq buldı. III urın Mälkän awılınnan - Niäz Ravilovqa birelde. Qalğannar “Ballı telle" "Tamaşaçı mäxäbbäte", “Şayan çayan”, “Tapqır yeget” isemenä layıq buldılar. Yegetläreneñ härqaysına maxsus büläktän tış tübätäy büläk itelde. Minzälä mäçete wäkile, Bötendönya tatar kongressı Başqarma komitetı da alarğa üz büläklär tapşırdı.
Landış Xarrasova
