Accessibility links

Кайнар хәбәр

«Tatarstan - Yaña ğasır» ictimaği xäräkäte yañadan säyäsi säxnäğä çığa


12 aprel könne «Yaña ğasır» ictimaği xäräkäteneñ Säyäsi Şura utırışı ütte. Säyäsi firqälär turındağı federal qanun çıqqaç, «Tatarstan -yaña ğasır» xäräkäteneñ könnäre sanawlı, digän fikerlär äytelgän ide. Ämma respublika xakimiätläre, «Berdäm Rusiä» säyäsi firqäseneñ cirle bülekçäsen tözü belän bergä, «Yaña ğasır» xäräkäten dä saqlap qaldı. İnde xäzer şuşı xäräkätneñ alğı sızıqqa çığuın küzätep bula. Ul municipal saylawlarda da qatnaşırğa uylıy, İctimaği palatanıñ tözüendä dä qatnaşırğa plan qora. Bu üzgäreşlärneñ säbäpläre närsädä? Saylawçılarnı nindi yañalıqlar kötä? «Yaña ğasır» xäräkätendä häm «Berdäm Rusiä» firqäseneñ Tatarstan bülegendä torğan keşelär isemlegen qarasaq, nigezdä ber ük isemnärne küräçäkbez. Ämma «Yaña ğasır» xäräkäte federal firqädän beraz ğına bulsa da ayırılırğa teli. «Yaña ğasır» xäräkäte citäkçese, Färit Möxämmätşin Säyäsi Şura utırışında çığış yasağanda, «Berdäm Rusiä» firqäse eçendä demokratiä bulmawına, Tatarstan täqdim itkän tözetmälärneñ Rusiä Dumasında ütmäwen, respublikalar mänfäğätläreneñ isäpkä alınmawın äytep kitte. Tatarstan Prezidentınıñ da xakimiät firqäsenä qarata äytelgän tänqidi fikerlären iskä alsaq, Tatarstan citäkçelegeneñ xakimiät firqäse belän bik uq qänäğät bulmawın kürep bula. Tatarstan Prezidentı Däwlät Şurasınıñ 10yıllığına bağışlanğan çaralarda çığış yasağanda, ictimaği oyışmalarnıñ tä’sirlege arta, «Yaña ğasır» xäräkäten saqlarğa häm üsterergä kiräk, dip beldergän ide. Färit Möxämmätşin da xäräkät aldında, saylaw aldı programmasın tözü, eşçänlekne, keşelär sanın arttıru maqsatın quydı. Üz idärä turındağı federal qanun cirle säyäsi köçlärgä üzlären kürsätergä mömkinlek birä. Şuña da, minisipal berämleklärgä saylawlar ütkärelgändä, «Yaña ğasır» xäräkäte anda üz keşelären ütkärergä telär ide. Tatarstanda tözeläçäk İctimaği palatada bu xäräkät qatnaşırğa uylıy. Xäräkät başlığı häm parlament räise Färit Möxämmätşinnıñ äytüenä qarağanda İctimaği palata turında qanun yaqın arada qabul iteläçäk. Mäs’äläneñ tağın ber yağı bar. Lider notığında, ber yaqtan «Berdäm Rusiä» firqäsenä konstruktiv oppozitsiä bulırğa, täqdim itelä. Ämma ikençe yaqtan, şul uq xakimiät firqäse belän kileşep eşlärgä dä kiñäş itelä. Cirle xäräkättä häm federal partiädä äğza bulıp torğan keşelärneñ küñelenä qaysı säyäsi köç yaqınraq bulır, älegä äytep bulmıy.

Bikä Timerova.

XS
SM
MD
LG