Accessibility links

Кайнар хәбәр

Tömän "Yañarışı" baş möxarrire Azat Säğitov wafat buldı


20 nçe april könne Tömän ölkäseneñ tatar xalqı zur yuğaltu kiçerde. Tatar telendäge “Yañarış” gazetasınıñ baş möxärrire Azat Säğitov wafat buldı. “Yañarış”nı berençe sanınnan oyıştırıp cibärgän millätpärwarğa, xoday täqdire, basmanıñ sintäberdä uzaçaq olı bäyrämen - 15 yıllığın qarşılarğa nasıyp bulmağan ikän. 15nçe april könne çıqqan gazetanıñ soñğı sanında ğına Azat Säğitov: “Yañarış”ıbızğa da 15 yıl tulıp kilä bit, duslar! Närsä belän genä, nindi onıtılmaslıq eş-ğämällärebez belän tarixqa kertep qaldırıyq ikän inde bu keçkenä genä waqıyğanı? Minemçä, iñ berençe bu istälekle yılnı “Yañarış”ıbıznıñ tirajın kütärergä tırışırğadır. 1nçe aprildän yazılu başlandı”,- dip yazğan ide. Soñğı aralarda Azat Säğitov sälamätlege qaqşap xastaxanädän çıqmadı. Ämma gazetanıñ här sanında baş möxärrir mäqäläläre dönya kürä kilde. Soñğıların ul äytep yazdırdı. 8nçe aprildä basılğan “Ğorurlanıp yäşise ide” digän mäqälädä mondıy yullar bar. “Bügenge tatar awıllarıbıznıñ könnän-kön möşkellänä bara torğan yazmışı bik tirän borçıy häm uylandıra bezne dä. Ä ni öçen andıy xälgä qalıp barabız-anıñ turında üzegez dä beläsez häm bügen inde ğäiplärne ezläp kenä ber närsä dä maytarıp bulmıy. Ä yäşärgä kiräk! Niçek yäşärgä? Bügen ömet üzebezdä. Ägär bügen ük awıllarıbızda tormışnı totqasınnan totıp, üzebez yaqqa qayırmıybız ikän, xällär könnän-kön naçar yaqqa ğına baraçaq”...

Azat Säğitov Tömän ölkäseneñ tatar xalqı tormışındağı här problemanı üz yöräge aşa ütkärde. Awıllar taraluğa, yäşlärneñ nıqlap eçä başlawına yandı-köyde. Tatar mäktäpläre yabıluğa, yäşläreñ tuğan telne belmi üsülärenä çañ suqtı. Milli säyäsättäge üzgäreşlärgä dä anıñ taypılmas üz qaraşı buldı. Tatar xalqınıñ bötenlege öçen köräşte. “Yañarış” gazetası, möxärrir tırışlığı belän, härwaqıt milli uçaq bulıp kilde. Redaksiä binasında törle oçraşular ütte. Ölkäneñ könyağında yäşäp icat itüçelärneñ ädäbi berläşmäse oyıştırıldı. Berläşmä rayon-awıllarğa barıp daimi räweştä oçraşular ütkärde. Qäläm tibrätüçe millättäşlärebezneñ ike distägä yaqın kitabı Azat Säğitov tırışlığı belän “Yañarışta” dönya kürde. Alar arasında şağirlär, tarixçılar häm kürenekle yazuçı Tuqay büläge iäse Yaqub Zänkievneñ äsärläre dä bar. “Yañarış” redaksiäsen üzenä kürä çın tatar öye dip tä äytergä bula ide. Yulı töşkän härkem mäqälä kitermäsä dä, monda kerep xäl-äxwäl beleşüne kürkäm ğädät itep sanadı. Gazetanınıñ baş möxärrire Azat Ğizzät ulı 1940 nçı yılnıñ 15 nçe dikaberendä Tubıl rayonınıñ Uba awılında dönyağa kilä. 1962 nçe yılda Tubıl pedagogiä institutı filalogiä fakultetınıñ rus-tatar bülegen tämamlıy. Ul institutta uqığan yıllarda Tubıl şähärendä tatar telendä “Lenin yulı” gazetası çığa başlağaç, tuğan telne yaxşı belüen tanıtıp ölgergän Azatnı gazetağa eşkä çaqıralar. İnstitutnı tämamlağaç xezmät yulın mäğärif belän bäyli. 1990 nçı yılda ölkä başqarma komitetı tatar telendä “Yañarış” gazetası açu qararın qabul itkäç, baş möxärrirlek wazifası Azat Säğitovqa tapşırıla. Soñğı sulışına qadär baş möxärrir qälämen qulınnan töşermäde.

Nail Alan,Tömän
XS
SM
MD
LG