Tatarstan uquçıları bıyıl EGE, Berdäm däwlät imtixannarın birä alaçaq. Respublika da Rusiädä inde berniçä yıl bara torğan älege eksperimentqa quşıldı. Şulay itep, Tatarstan uquçıları da Berdäm däwlät imtixannarın birergä äzerlänä. Mäktäp uquçıları üzläreneñ belem däräcälären sınap qarar öçen aprel’ ayında böten Rusiä buylap sınaw imtixannarı ütä. Bu imtixannar, şulay uq, EGEnı oyıştıruçılarnıñ da yaña eşkä äzerlegen, anı ütkärüdä nindi citeşsezleklär barlığın belergä dä yärdäm itäçäk. Sınaw imtixannarınıñ berençese comğa, 22 aprel’ könne uzaçaq. Uquçılar bu könne matematikadan imtixan birep qarıy alaçaq. İmtixannar bu yulı sınaw räweşendä genä ütkärelsä dä, alar bik citdi äzerlänep, oyıştırılğan räweştä ütäçäk. Comğa könne ütäçäk imtixan, aña äzerlek turında Tatarstannıñ Fän häm mäğärif ministrlığınıñ Berdäm däwlät imtixannarın oyıştıru bülege citäkçese İlnur Mirğäliev söyli.
Respublikada 32 meñnän artıq uquçı matematika fänennän sınaw imtixanın birep qararğa teläk belderde. İmtixannarnı qabul itü öçen maxsus urınnar oyıştırılğan, alarnıñ sanı 153. Anda balalarnı cıyıp alıp kiläçäklär, maxsus äzerlängän keşelär biremnärne taratıp, eşlängän eşlärne cıyıp alıp tikşeräçäk. Respublikanıñ här rayonında, telägän här mäktäp uquçısına şartlar tudırılğan. İmtixan birü urınnarı mäktäp häm yuğarı uqu yortları binalarında urnaşqanŞulay uq bez İlnur Mirğälievtan tatar balaları öçen imtixannı Ana telendä belergä mömkinlek bulaçaqmı, dip tä soraştıq. Anıñ süzlärenä qarağanda, sınaw imtixannarı barı tik rus telendä genä tapşırılaçaq. Läkin töp Berdäm däwlät imtixanın teläge bulğan uquçı matematika, fizika häm ximiä fännäre buyınça tatar telendä dä birä alaçaq. Şuşı imtixan nigezendä abiturientlar respublikanıñ yuğarı uqu yortlarına da kerä alaçaq. Läkin imtixannı ana telendä birgän oçraqta, başqa Rusiä töbäklärendäge yuğarı uqu yortlarına EGE näticäläre buyınça kerep bulmayaçaq.
Şunısın da äytergä kiräk, bıyıl Berdäm däwlät imtixannarın ana telendä barı tik respublikada yäşäwçe tatar balaları ğına tapşıra ala. Çit töbäklärdäge millättäşlärebez isä imtixannarnı barı tik rus telendä genä biräçäk. Läkin, Tatarstannıñ Fän häm mäğärif ministrlığınıñ Berdäm däwlät imtixannarın oyıştıru bülege citäkçese İlnur Mirğaliev fikerençä, törle töbäklärdäge tatar mäktäpläre yäki sıynıfları öçen respublika belgeçläre tatar telendäge biremnärne yasap birergä äzer. Kiläçäktä älege eş töbäklär arasındağı kileşü nigezlärendä eşlänergä mömkin, läkin bu äle Rusiä Berdäm imtixannarğa tulısınça küçkäç, yäğni, 2008 yılda ğına bulır, dip sanıy ul.
Gölnaz İlgizär
