Accessibility links

Кайнар хәбәр

Qazanda Tuqaynıñ tuğan köne häm Tuğan Tel bäyräme ütte


Aldan yañğırlı häm salqınça kön wäğdä itelsä dä, Tuqay tuğan köne qoyaşlı häm cılı buldı. Kamal teatrı andağı mäydanda 1meñläp keşe cıyıldı. Teatr işek töbendä säxnä tözelde, anda şağirlär, törle däräcädäge citäkçeläre, zıyalılar tordı. Mäydanda cıyılğan xalıq arasında studentlar, cämäğätçelek wäkilläre, şiğriät häm tatar mädäniätenä bitaraf bulmağan keşelär cıyıldı. Yazuçılar berlege räise bäyrämneñ räsmi öleşendä çığış yasadı. Şunda uq, bıyılğı Tuqay büläge lawreatları isemnäre iğlan itelde. 3 lawreattan berse, Zöfär Ğimayıv qına bäyrämgä kilä alğan ide. Ul mikrofon aldına çığıp, räxmätlären belderde. İkençe lawreat, şağir Röstäm Miñğalim şiğerläre dä säxnädän uqıldı. Şağir Läbib Leron, «Azatlıq» radiosı xäbärçesenä zamandaşı häm fikerdäşe Röstäm Miñğalim öçen bik şat buluın belderde. Bıyılğı lawreat kompozitor Şamil Şärifullin şulay uq, bäyrämgä kilmägän ide. Anıñ wäkile itep, Şamil äfändeneñ tormış iptäşe Nailä xanım buldı. Anıñ äytüenä qarağanda, Şamil Şärifullin lawreat buluına bik şatlanğan, ämma bülägennän dä bigräk, kompozitornı tamaşaçılarnı anı onıtmawı quandıra ikän. Şul arada bäyräm däwam itte. Şağirlär äsärlären uqıdı, citdi çığışlar, cır, muzıka belän aralaştırıp bardı. Bäyräm turında fikerlären sorarğa, eskämiädä utırğan yawlıqlı äbilär belän söyläşep aldıq. Alar yıl sayın bu bäyrämgä kilälär ikän, üzläre dä şiğerlär yazalar häm Tuqay şiğerlären haman küñeldä saqlıylar. Tuqaynıñ tuğan köne häm şiğriät bäyräme, ul äle zıyalılarnıñ oçraşu urını da. Xalıq arasına çıqqan şağirlärne yäşlär tanıp, äylänerderep alıp, qul tamadaların aldı, bergäläp foto räsemgä töşte. Här yaqtan tatarça söyläşkän tawışlar işetelde. Bäyrämneñ räsmi öleşe köndezge säğät biştä tämamlandı.Annan soñ, Kamal teatrı aldındağı mäydanda bäyräm konsertı başlandı. Anda Tuqay şiğerlärenä dä, xäzerge zaman şağirläre süzlärenä dä yazılğan cırlar başqarıldı. Açıq hawadağı konsert, şiğriät bäyrämenä qarağanda tağı da kübräk qazanlılarnıñ iğtibarın cälep itte.



Bikä Timerova.

XS
SM
MD
LG