Bügen Ğiraq başqalasında eçke eşlär ministrlığınıñ brigada generalı İbrahim Xamas üz öyennän çıqqaç atıp üterelgän.
Ministrlıqnıñ kriminal küzläw bülegendä eşlägän Xamasnıñ üterelüe öçen cawaplılıqnı Äl-Qaidäneñ Ğiraqtağı qanatı üz östenä alğan.
Elegräk Fällücä şähäre yanındağı yäşeren höcüm waqıtında totıq itep alınğan 7 Ğiraq törkmäneneñ mäyete tabıldı. Politsiä äytüençä, alarnıñ qulları bäyläp, başlarına atıp ütergännär. Politsiä şulay uq dokumentlarına qarağanda alar ber iminlek şirkäte öçen eşläwçe Kirkük şähäre törkmännäre bulğan di.
Ğiraqnıñ Baici şähärendä intixarçı bomba şartlarıp ike politsiä xezmätkären ütergän. Şulay uq Baquba şähärendä maşinağa quyılğan bomba şartlap 14 keşene yaralağan.
Uzğan ay axırında Ğiraqta yaña xökümät tözelgännän soñ ğisyançılarnıñ höcümnäre arttı häm 500 çaması keşe üterelde.
