Accessibility links

Кайнар хәбәр

Däwlät Şurası binasınnan Tatarstan bayrağın alırğa mömkinnär


Tatarstan Däwlät Şurasınıñ Däwlät tözeleşe häm cirle üzidarä komitetınıñ sişämbedäge utırışı Tatarstan prokurorı täqdimen tikşerde. Soñğı yılların prokuror täqdimen nigezdä xuplap,qaywaqıt kire qağıp qına utırğan Däwlät Şurasına, bu yulı prokuror parlament tübäsendä urnaşqan Tatarstan bayrağın alıp taşlarğa, yä bulmasa Rusiä bayrağın da elep quyarğa täqdim itä. Rusiä qanunnanrı buyınça Rusiä bayrağı töbäk bayraqları belän ber tigez däräcädä elengän bulırğa tieş. Ä Tatarstan parlamentı binası tübäsendä barı tik Tatarstan bayrağı ğına elengän. Monnan tış. Prokuror küzläre, Däwlät Şurası işek aldında da Rusiä bayrağı Tatarstannıqınnan keçkenäräk kürengänlegen sizep alğan. Tözätüne taläp itä. Komitet äğzaları, soñğısı belän kileşmilär. Yäğni işek aldı bayraqları bertigez, süz tidererlek tügel dilär. Ä menä üzläre utırğan bina tübäsenä Rusiä bayrağın elärgä alar qarşı tügel. Tik mömkinlek kenä yuq ikän. Bu xaqta Azatlıq radiosına Däwlät Şurasınıñ Däwlät tözeleşe häm cirle üzidarä komitetı räise urınbasarı Flera Zıyätdinova bolay dip belderde

Berençedän, bezneñ binabız xäzer şaqtıy tawşalğan, cire urınınnan quzğalğan. Bayraq üze ber keçkenä bülmä qädär ul. Däwlät Şurası binası tübäse bik nıq iskergän dilär belgeçlär, aña tağın Rusiä bayrağın da quyar öçen, bik küp beton, timerlär quyarğa turı kiläçäk. Alarnı kütärergä binanıñ köçe citmäyäçäk

Deputatlar, Parlament tübäsenä elü mömkin bulmağan oçraqta, Däwlät Şurasına terälep kenä tözelep betep kilgän Tatarstan xökümäte binası tübäsenä Rusiä bayrağın qadarğa täqdim itälär. Flera Zıyätdinova fikerläre

Yaña tözelä torğan Xökümät binası zur zal belän totışqan bula, alar anı bergä qullanaçaqlar. Xätta aşxanäläre dä bergä bula. Menä şuşı bina äzer bulğaç, bayraq turındağı mä’sälägä yañadan qaytıp. Söyläşergä süz birdek. Kerü işegendä, bayraqlar elenep tora. Rusiäneke dä, Tatarstannıqı da. Xätta alar ikeşär dä. Şuña kürä, simvolikanı qullanmıylar, qanunnarnı bozalar dip äytergä, turıdan-turı säbäbe yuq dip uylıym.

Tatarstan xalıq deputatı Flera Zıyätdinova fikerlären işettegez. 90 yıllar başında zur köräşlär näticäsendä Däwlät Şurası tübäsenä qunaqlağan, respublika suverenlığınıñ ber simvolına äylängän Tatarstan bayrağınıñ yazmışı niçek xäl iteler, älegä mäğlüm tügel. Hiç yuğında, Tatarstan prokurorınıñ, bu xaqtağı täqdimnärenä qarşı, deputatlar xoquqi cawap taba almadılar, binanıñ iskelegenä genä sıltadılar. Şuña kürä,älege mäsälne bu aralarda parlament utırışında tikşerüdän baş tarttılar.

Räfis Cämdixan

XS
SM
MD
LG