Accessibility links

Кайнар хәбәр

Qazanda äflisun inqilabı


Qazan soñğı könnärdä uzğan yılnıñ közendäge äflisun tösle Kievnı xäterlätä. Oranjevaya revolyutsiäneñ mäğnäse genä başqa. Poçmaq sayın, uram sayın äflisun tösle kiemdäge keşelärneñ şundıy uq qızğılt sarı töstäge texnikalar, avtomobil'lär tiräsendä qaynaşuı Qazannıñ 1000-yıllığına sanawlı könnär qaluın añlata. Nihayät, cimerek şähär uramnarın tözekländerergä 2.5 milliard täñkä aqça birelgäç, 30лап uramda beryulı asfal't sala başladılar. Bu qädär K-700 markalı qızğılt sarı traktorlarnıñ, katoklarnıñ, ekskavatorlarnıñ, şulay uq äflisun tösendäge kamAZlarnıñ beryulı Qazan uramnarına çığuın ğömerdä kürgän yuq. Bu şunı añlata. Qazan xakimiäte yullarnı tözergä respublika aqça birmi dip ränci, ä Tatarstannıñ yul tözü ministrlığı şähärara yullardağı mäşäqätlärne taşlap, Qazanğa küçerelde. 1945 yılda Berlinnı alunı xäterlätä bu asfal't höcüme. Üzäk uramnarda asfal'tnı ikeşär, öçär, dürtär tapqır ällä nindi çeltärlär, sumalalar qatnaştırıp cäyälär. Häm imeşter avgustqa qädär iñ zatlı uramnarğa maşinalarnı kertmäskä tieşlär. Çönki asfal't watılırğa, cimerelergä mömkin. Ä bolay, saqlap totqanda häm maşinalarnı ipläp kenä çığarğanda bu tözek yullar 5 yılğa citärgä tieş ikän. Döres, asfal't häm texnika qulları citmägän uramnar, tıqrıqlar xätsez genä. Näq 3 aydan soñ avgust axırında tözelmägän küper, 5-6 metro stansiäse, xalıqara däräcädäge at çabışı stadionı, Milli universitet binası, yaña Boz sarayınıñ diwarları ayaqqa basuğa hiç ışanıp bulmıy. Bik qızıq macara bulaçaq bu Qazan tözü. 1000 yıl buyı tözemägänne soñğı 3 ayda tözep quyu näq Rusiä ğörefläre ruxında. Şunıñ östäwenä 1000 yıllıqqa äzerlek künegüläre görläp tordı. İminlekne tä'min itü öçen uramda kitep barğan yäki cıyılıp torğan keşelärne tikşerü, maşinalarnı da tuqtatıp, dokumentların qaraw, maxsus oyıştırılğan sınawlar waqıtında bombalar qaraçqısın binağa kertergä tırışu, açıq awız qarawılçılarnı tänqitläw - bolar barısı da bügenge Qazan. Mawıqtırğıç häm borçulı, şaqtıy qızıqlı bu tormış. Rimzil Wäli, Qazan.
XS
SM
MD
LG