Tatarstan prezidentı Mintimer Şäymiev Rusiä belän Tatarstan arasında bara torğan söyläşülärgä qayber açıqlıqlar kertte. Bu xaqta ul “Ведомости” gäzitenä beldergän. Älegä qädär respublika başlığı Rusiä belän Tatarstan arasında tözelergä tieşle yaña şartnamä xaqında, söyläşülär barışı turında belderülär yasağanı yuq ide. Bu xaqta söyläşülärdä qatnaşuçı komissiä wäkilläre genä xäbär itä ide. Mä’sälä, çınlap ta, tatar telenä kilep terälgän. İnde Azatlıq xäbär itkänçä, Mäskäw tatar tele yazmışın üz qulına alırğa teli. Tatarstan isä tatar tele, anıñ nindi yazulı buluın Tatarstan üze xäl itärgä tieş dip bara. “Ведомости”gä birgän intervyusında Mintimer Şäymiev, federal' üzäkkä xalıqlarınıñ mänfäğätläre turında tieşle däräcädä uylarğa kiräk, latin mä’säläse dä säyäsiläşterelgän mä’sälä dip belderä. Söyläşülär bara torğan şartnamä proyektınıñ başqa matdälärenä kilgändä, Mintimer Şäymiev, neft' mä’säläsenä ayırım tuqtala. Tatarstan nefettän kergän keremgä salımnı başqa töbäklär kebek ük tülämäyäçäk, bu xaqta kileşende di. Yäğni, salımnar azraq bulaçaq digän süz bu. Häm aların ber küpme öleşe Tatarstanğa da qalaçaq. Läkin, şulay da, Tatarstan prezidentı, kileşülärdä närsägä ireşelde, närsägä yuq, bu xaqta äle açıq itep söylärgä irtäräk, xäl itelmägän mä’sälälär qala birä di.
Räfis Cämdixan
