Qazannıñ 1000 yıllığı aldınnan başqalanıñ qayber uramnarı watıq yulları, cimerek binaları belän suğıştan soñğı xälne xäterlätä. Üzäk uramnar tözü eşläre belän mäşgul' eşçelär, qom, sement taşuçı maşinalar, yul saluçılar belän tulı. Xäzer Qazan bäyrämenä elgeregä dip eşçelär täwlek buyı xezmät quya. Alar berniçä smenağa bülenep yullar sala, binalar tözekländerä. Xäzerge waqıtta Qazanğa kilgän keşelär şähärne kürgäç aptırap qalalar. 3 yıl elek N'yu-York şähärennän Qazanğa Keyt Greni kilgän bulğan. Tatarstan häm Başqortstan turında zur fänni xezmätlär yazğan Keyt bügen “Azatlıq” radiosında da buldı. Ul Qazan turındağı fikerläre belän dä urtaqlaştı:
Qazan üzgärgän – restorannar, bankomatlar kübäygän. Kiläçäktä bik matur bulaçaq, ämma xäzer mäxşär xälendä.Cıyılışlarda Tatarstan, Qazan citäkçeläre, yubileyğa başqalanıñ töp obyektların bulsa da, tözekländerep betäçäk dip wäğdä itälär. Ä waqıt bik az. Bäyrämgä qädär 84 kön genä qalıp bara. Şähär xalqı remont säbäple yullarda cäfa çigä, metro tözü näticäsendä susız utıra. Bäyrämgä qädär, Qazannıñ tözekländerelep betereläçägenä qayberläre şiklänep qarıy.
Xalıq fikeren belergä teläp, “Azatlıq” radiosı xäbärçese bügen Qazan uramnarında soraştıru uzdırdı. Sezgä dä alarnıñ fikerlären täqdim itäbez:
Bügen böten cir qazılıp taşlanğan. Ämma Qazan bäyrämenä barısı da äzerlänep betärgä tieş.
Qazannı tözekländerügä Tatarstan ğına tügel Mäskäw, Sankt-Peterburg, çit ildän kilgän qunaqlar da yärdäm itä. Äzer bulmayaçaq. Böten cirne plenka belän qaplayaçaqlar. Anıñ bötenesen bäyrämgä qädär eşläw möhim tügel. Käyef yaxşı bulsın. Bernärsäne dä eşläp beterä almayaçaqlar. Yullar tişek-toşıq. “Sovet” gostinitsasın cimerdelär. Kiräkmi ide. Bik matur tora ide. Bez bäyrämne qurqu belän kötäbez. Bezne Qazannan quıp çığaraçaqlar. Niçek kiräk şulay yasap quyaçaqlar. Ber Potemkina derevnya bulaçaq.
