Qol Şärif mäçeteneñ açılışı Qazannıñ yäşäyeşenä zur tä’sir yasadı. Kreml yannarı ğına tügel, Yärminkälär mäydanda yullarda xäräkät tuqtatıldı. Näticädä avtomobillär başqa yullarğa yünältelde, Qazan uramnarı tığıldı, başqaladağı här keşe diärlek, külämle çaralarnıñ ütkärelüen üzendä sizde. Qazan Kremle eçenä, çaqıru käğäzläre belän genä kerep buldı. Anda respublikanıñ ataqlı keşeläre çaqırılğan ide. Kön salqın häm yañğırlı bulğanğa küräme, keşe sanı, aldan iğlan itelgän 5 meñnän, azraq ide. Kreml qapqaları yanına timer ezlägeçlär quyıldı, här kemne, isemleklärdä ezläp tabıp, äyberlären qapşap kerttelär. Eçtä, tözeleş eşläre tämamlanğan ide. Äle 2 kön elek cäyelmägän märmär plitälär urınnarınnda ide. Mäçet tiräse militsiä belän äyländerep alındı. Tribuna yanına kiler öçen, yañadan tikşerüçelär aşa uzarğa turı kilde. 1-2 distä Televidenie kameraları öçen, 10 metr çaması bieklektä keçkenä säxnä tözelgän ide. Annan çit il häm Rusiä jurnalistları reportajların alıp bardı. Mäçet açılışın yaqtırtırğa dip, Amerika, Angliä, İtaliä, ğäräp illäre jurnalistları da kilde. Kreml eçendäge bäyrämdä, Tatarstan rayonnarı delegatsiäläre buldı. Buadan mäsälän, 60 keşe kilgän, Qama Tamağınnan – 40. Barlığı 1000 meñgä yaqın keşe respublika rayonnarınnan cıyıldı. Ğadi Tatarstan möselmannarı belän bergä bäyrämgä törle räsmi keşelär dä çaqırılğan ide. Mäsälän, möselman däwlätläre wäkilläre : Säğät Ğäräbstanı, Suriä, İran, Misır, Törkiä, Yämen häm başqa il keşeläre buldı. Üzbäkstan, Belorus häm Ukrain islam din ähelläre dä kilde. Tatarstannan saylanğan Duma deputatları, tübätäy kigän ministrlar da kürende. Mäçet yanındağı tribunada, Kamal teatrı artistları tamaşa kürsätep aldı. Qol Şärif bulıp kiengän artist, xäzerge buyın möselmannarına räxmätlären belderde. Qazan xanlığı mäçeteneñ torğızıluına şatlandı. Kreml eçenä kergän barlıq xatın-qızlar, millätlärenä häm totqan dinnärenä qaramastan, çäçlären qaplağan ide, ir-atlar başlarına käläpüşlär kide. Xätta, räsmi keşelär dä tübätäy belän başların qapladı. Tantana başlanıp kitkän säğätlärdä, alar mäçet aldındağı säxnägä çıqtı. Räsmi keşelär, qunaqlar arasında «İslam konferensiäse» oyışması başlığı, Kuveytnıñ islam eşläre ministrı, Rusiä xökümäte başlığı urınbasarı, Tatarstan prezidentı, xökümät räise, parlament citäkçese urınbasarı, şähär başlığı, möfti häm pravoslav din başlığı da buldı. Räsmi çığışlar başlandı.
Tantana barğan minutlarda mäçet qırında qaynar çäylär satıp tordılar. Säxnädän çittä torğan keşelär, ozınğa kitkän çığışlardan ayırılıp, qapqalap alırğa, cılınırğa aşıqtı. Yañğır yawa başladı. Qayberäwlär qaytu yulına çıqtı. Bez çittä torğan keşelär belän söyläşep aldıq. Mäçetneñ tözeleşenä sädäkä birgän 35 meñ keşe arasında bu bäyrämgä kilgän möselmannar da bulğan. Bez söyläşkän uqıtuçı apa, bik zur waqiğada qatnaşuına, dulqınlanuın añlattı. Qama Tamağı rayonnan kilgän äbilär, mäçet tözeleşenä zamanında, 200 sum birüen iskä aldı. Tözelep betüen kürü bäxetenä şatlanabız didelär. Kreml eçenä kerä almağan keşelär, Yärminkälär mäydanında cıyıldı. Anda zur ekrannar elengän ide. Şularda turı translatsiä bardı. Kön salqın häm yañğırlı bulğanğa kürä, keşe kötelgänçä küp cıyılmadı. Berniçä meñ genä buldı. Mäçet yanına yaqınraq kilergä telägän, ämma çaqıru käğäzläre bulmağanğa, kertelmägän, räncegän möselmannar da oçradı. Mäydanda, yañğır astında utırırğa telämägän keşelärneñ qaysıberläre qaytıp kitte. Qalğannarı ekrandağı mäçetkä qarap, imamğa iärep, uramda comğa namazın uqıdı.
Bikä Timerova.
