Accessibility links

Кайнар хәбәр

Qazanda 300dän artıq bina süteläçäk


Qazannıñ 1000 yıllığı haman da iñ aktual tema bulıp qala. Saban tuylar ütep kitkäç, şähärneñ qiäfäte, yullarnıñ torışı yañadan kön tärtibenä mende. Kön ütkän sayın, remontqa yabılğan uramnarnıñ sanı arta bara. İnde Bolaqnıñ sul yağındağısı da, uñ yaqtağısı da yabıq. Bökelärdä toru Qazan xalqı öçen ğädäti eşkä äylänä bara. Tözeleşne tämamlap bulmaw häm kürenä torğan cirlärne genä remontlaw turında xäzer räsmi räweştä dä äytälär. 28nçe yündä, Tatarstannıñ arxitektura häm tözeleş ministrı Marat Xösnullin, jurnalistlar belän oçraşıp, 1000 yıllıqqa äzerlek barışı turında küpmeder mäğlümat birde. Mäsälän ul Qazan toraq yortlarınıñ uram yaqların yañartır öçen byudjettan 150 million sum birelgän, dip äytte. Bu summa bik az, dip sanıy ministr. Anıñ isäpläwençä, ul aqça räsmi delegatsiä ütä torğan uramnardağı ğına yortlarnı ağartır, buyar öçen citä. Däräcäle qunaqlar ütmi torğan cirlärdä remont eşlären yasarğa, tağı 100 million sum kiräk. Alarnı birüçe yuq.

Şulay uq, tözeleş ministrı äytkänçä, şähär üzägendä cimerek binalarnıñ xucaları bar. Eşmäkärlär alarnı satıp alıp, iske yortlarnı cimerep, yañalarnı tözü turındağı wäğdälären ütämilär. Xäzer xökümät ul keşelärne ezläp tabıp, niçek tä bulsa cimereklärne yäşerü burıçın quyarğa cıyına, dip xäbär itte Marat Xösnullin. Şähär üzägendäge cimerelü, sütelü tempların küz aldığızğa kiterer öçen, ber san kiteräbez. Şähär televidenie kanalı xäbär itkänçä, yaqın könnärdä, başqala xakimiätläre üzäktän 300dän artıq iske binanı yuq itü planın quyğan. Cimereklärne şähärdän alıp çığu eşe tönlä alıp barıla. Äle köndez torğan binanıñ irtän yuq buluı şunıñ belän añlatıla. Ekologiä xezmäte dä çan suğa. Maşinalar şähär çitendäge çüplekkä barırğa telämiçä, cimereklärne Qazannıñ ışığraq urınnarına ğına alıp barıp tügä. Şulay itep, çüp ber urınnan ikençe urınğa genä küçä. Şul uq, tözeleş ministrı birgän mäğlümatlarğa qarağanda, yaña binalar, yañartu eşläre, cimerü tizlege belän bulmasa da, axırğa taba bara. Häm zur tözeleşlär waqıtında tämamlanır, di Marat Xösnullin

Bikä Timerova

.

XS
SM
MD
LG