Xäbär itüebezçä, uzğan atnada tatar matbuğatı torışı turında kiñäşmädä başqarma qomitetnıñ ber törkem äğzaları fetnä oyıştırğan ide. Alar oyışmanıñ räise Ruşan Ğallämov eşennän qänägät bulmawların belderde. Ul turıda maxsus möräcägät äzerläwlären ireştergän idelär.1nçe iyül uzğan ul utırışta Ruşan Ğallämov tarafdarları kübräk bulu säbäple, fetnä uñışsızlıqqa oçradı. Möräcägät qabul itelmäde. İnde başqarma qomitetnıñ ber törkem äğzaları isemennän ul möräcägät “Başinform” mağlümat ağentlığınıñ internet säxifäsendä 5nçe iyül dönya kürde. Anda “Bez başqarma qomitetnıñ soñğı çordağı eşçänlegenä borçılu belderäbez. Yaña citäkçe oyışmanıñ pozitiv eşçänlegennän yıraqlaşa. Törle odioz häm ekstremistik köçlär belän berläşep, küz aldında qonfrontatsiä häm ızğış yulına kerep bara, awantyura häm säyäsi uyınnarda qatnaşa” dielgän. Möräcägät başqarma qomitet citäkçese Ruşan Ğallämovqa ışanıç kürsätmäw belderü belän tämamlana.
Başqarma qomitet tiräsendä wäzğiät, anıñ räise Eduard Xämitov Rusiä Däwlät Dumasına deputat bulıp kitkännän soñ, yaña räis saylanu belän başlandı. Xämitov üz urınına täqdim itkän nämzät tawış cıya almaw säbäple ütmäde, yaña saylanğan Ruşan Ğallämov xaqimiät tarafdarı tügel. Qarşılıq 22nçe iyün Başqortstan tatarları milli-mädäni moxtäriäteneñ Ufada uzğan qorıltayınnan soñ ayıruça üsep kitte. Ul qorıltayda Başqortstan tatarları problemnarı respubliknı başqa ber kürşe töbäkkä quşqan oçraqta xäl itelmäs mikän digän täqdimnär bulğan ide. Läkin bu täqdimnär qorıltay doqumentlarına kertelmi, közen uzaçaq qorıltayda qararğa qadırıldı. Ul qorıltayda Kzannıñ meñyıllığın bäyräm itügä Räximovnı çaqırmawnı sorap Tatarsan Prezidentı Mintimer Şäymievqa möräcägät tä qabul itelgän ide.Çarada Ruşan Ğallämov ta qatnaştı häm çığış yasadı. Bolar barısı da başqarma qomitetnıñ xaqimiät taraflı äğzaların yaña köräşkä ilhamlandırdı.
Başqarma qomitet äğzası, Başqort däwlät uniwersitetınıñ sotsioloğiä qäfedrası mödire, professor Cäwdät Ğıylacetdinov ayırım möräcägät belän çıqtı. Ul säyäsi eşçänlek belän şöğellänü ustawta qaralmağan dip, ustawnı bozuçılarnı başqarma qomitettan çığaru kiräklege turında qarar qabul itärgä çaqıra.
Başqarma qomitet tiräsendä qarşılıqlar däwam itä.
