İrannıñ yaña prezidentı da ilneñ atom säyäsätenä ber nindi dä üzgäreş kertmiäçäk. Bu xaqta bügen tışqı eşlär ministrı Kamal Xarrazi Tähranda çit il diplomatları qarşında belderde. Yevropa wäkilläre, elek İslam inqilabı tarafdarı bulğan yaña prezident Mahmud Ahmadi-necadnıñ İrannıñ atom mäsäläsendäge qaraşın tağın da kiskennäşterä ala dip farazlağan ide. Xarrazi süzlärenä qarağanda, İranda kiñ säyäsätneñ nigeze yuğarı yulbaşçı Ayatolla Ali Xameni tarafınnan bilgelänä. Xäkümät barı tik yuğarı citäkçe bilgelägänne tormışqa aşıra. Saylawaldı kampaniäse waqıtında Ahmadi-necad İran diplomatlarınıñ Yevropa Berlege belän söyläşülärendä sülpänlek kürsätüen täñqitlägän ide. Prezident itep saylanğaç ul söyläşülärne däwam itäçägen belderde.
