Eçke eşlär ministrı Äsxät Säfärov, jurnalistlar belän oçraşqanda, militsiäne tänqitlämäskä häm kiresençä, alarğa teläktäşlek kürsätergä çaqırdı. Qazannıñ 1000 yıllığına äzerlekkä xäzer Tatarstan militsiäse böten köçe taşlağan, äle alay ğına da tügel, 7,5 respublika militsiäsenä, tağın 11 meñläp çittän kilgän militsiä, xärbilär, uçileşe kursantları cälep iteläçäk. Başqa Rusiä töbäklärennän tärtip saqlawçılar inde kilä başlağan, alar arasında Krasnodar militsiäse xezmätkäre mäsälän. Zur çaralar ütkärelgändä, Qazanda quyılğan 150 video kamera aşa küzätü alıp barıla, mäsälän, Qol Şärif mäçete açılışı waqıtında ul küzläw sisteması inde sınalğan. 21nçe yuldä, anı Blagoveşenie soborı açılışında dä eşkä cigeläçäk ikän. Terrorğa qarşı öyränülär, küplärgä oşamasa da, däwam iteläçäk, dide Eçke eşlär ministrı Äsxät Säfärov. Yartı yılğa näticä yasağanda, ministr qayber sannarnı kiterde. Migratsiä tärtiplären bozğan öçen 1606 çittän kilüçe Tatarstannan quyılğan. Bu ber yılğa quyıla torğan san bulsa da, çitkä sörü anıñ belän genä betmi, dip añlattı Äsxät Säfärov. Terrorğa qarşı toru teması turında, Eçke eçlär ministrı beraz mäğlümat birde, ämma jurnalistlarnıñ ber sorawına da cawap qaytarmadı. Äsxät Säfärovnıñ äytüenä qarağanda, Tatarstanda terror ğämällären äzerlägän törkem totılğan. Kiläçäktä mäxkämä eşläre bulaçaq, waqıtında barısın da belersez, dide ministr. Qayçan totılğan, niçä keşe, tağın niçä terrorçını ezlilär, bolar xaqında ul ber süz dä äytmäde. Ämma, «Xiz but tahrir», «Cämäät» häm başqa şundıy ekstremist ruxlı oyışmalar belän üzebezne liberallarça totmayaçaqbız, dip wäğdä itte ul. Saqal yörtkän möselmannarğa da, militsiä xezmätkärläre tarafınnan çamadan tış iğtibar bulırğa mömkin. Küptän tügel, Qazan däwlät universitetında waqıtlıça totqarlanğan saqallı möselman yegete turında xäbär itkän idek. Yawlıqlı möselman xatın-qızlar da, saqçılar tarafınnan şikle keşelär rätenä kerüenä zarlana. Bu xällärgä eçke eşlär ministrı urınbasarı Foat Zinnurov terrorğa köräş taläpläre belän añlattı. Tüzärgä turı kiläçäk alarğa, dide ul.
1000 yıllıqqa äzerlänü maqsatınnan Eçke eşlär ministrlığı Qazan xalqına möräcäğät itep, 16 qağidäne ütärgä çaqıra. Mäsälän, här waqıt pasport yörtergä, balalarnı iğitibarsız qaldırmasqa, dokument tikşerdergändä tınıçlıq saqlarğa, şäxsi maşinada yörergä tırışmasqa,taşlap qaldırılğan äyberlärgä iğtibar itärgä, uyaw bulırğa, xökümät maşinaları uramnan barğanda balkonğa çıqmasqa, qoral bulsa, üzegez belän yörtmäskä, bäyärm könne köymädä yözmäskä, keçkenä oçqıçlarda yörmäskä kiñäş itelä.
