Şul uq waqıtta Ölkä administratsiäse dä, tar dairädä bulsa da, saqlana. Anda ike vitse-gubernator qaralğan: berse - administratsiä citäkçese, ikençese - İminlek Şurası räise. Soñğısı da yaña närsä. Maqsatı - xoquq saqlaw häm köç strukturaları eşçänlegen koordinatsiäläw, dilär.
Mondıy üzgäreşlärne añlamawçılar da bar. Äytik, gubernator barlıq burıçlarnı da Xökümätkä yöklägäç, üzen nişlär soñ? Ä prokuratura süzçese Vasiliy Zima: “Prokuraturanıñ üz vertikale bar häm bez Ölkä Sovbezına bäyle tügel”, - dip belderde.
Säyäsi küzätüçelär äytüençä, mondıy üzgäreşlär Mäskäwgä oxşarğa tırışu ğämäleder: oçı-qırıyı kürenmägän reformalar şartlarında yäşibez, moña Sember ölkäse dä üz öleşen kertergä tırışadır, imeş.
Mäğärif ölkäsendä okruglar iñderü täcribäse Samar ölkäsendä uñışlı uzğan, axrısı: şunıñ ürnägendä Sember ölkäsendä dä okruglar oyıştıruğa äzerlek başlandı. Ä Sarıtaw ölkäse wäkilläre Sembergä - Poselenielär oyıştıru buyınça yul yaruçı ölkä üzägenä täcribä öyränergä kilgännär. Şuşı reformanıñ asılında moña qädär isän-imin qalğan tatar awılların qorıtu yata, dip añlasañ, Sarıtaw ölkäseneñ üzeneñ dä kolxozlarnı erelätü täcribäse bar, yuğisä. Mäsälän, Petrovka rayonı Ust''-Uza awılı Gorbaçev cepşeklege arqasında Berezovka awılın aşatu wazifasınnan qotılğan ide. Ägär Ust''-Uzanı tağın da Berezovka poseleniesenä kertsäñ, status-kvo qayta da quya.
Cirle avtonomiä prezidiumınıñ soñğı utırışında qışqı-yazğı eşlärgä yomğaq yasadı. Töp süz ölkä Sabantuyı turında buldı inde. Bik yaxşı uzğanın bilgeläp üttelär, läkin, kiläçäktä tözäter öçen, citeşsezleklär dä yaqtırtıldı.
Utırışta şulay uq Qazanda avgust axırı tantanalarında qatnaşaçaq delegatlar isemlege raslandı. Qızğanıç, bu mäs''älä buyınça qıtırşılıqlar da buldı. Bu turıda süz yörtü üze ük uñaysız da bit, nişliseñ inde: üzebez şundıy, tormışı şundıy.
Ölkä üzägendäge berdän-ber tatar aşxanäse xucabikäse Asiä Mölekova delegatsiädä ana tele uqıtuçıları, üzeşçän sänğät citäkçeläre, yäşlär bulmawına rizasızlıq belderde. Ä prezidium äğzalarınıñ barısı da isemlekkä kertelgän, faydalı ğämälläre küzgä çalınmasa da. Barı tik şundıy uq äğza Mäxmüt Xäyrullinğa ğına urın tabılmağan. Anıñ ”Tuğan tel” oyışması räise buluı moña säbäp tügelme ikän?, dide ul.
Asiä xanım şulay uq Avtonomiä räise urınbasarı bulıp tüläwle eştä toruçı Rifqät Äxmädullovnı Qazanğa qunaqqa barudan baş tartırğa öndäde: “Sez, Roman Fedoroviç, araqı zavodınıñ baş injenerı bulıp eşlägändä, 5 yıl ğına elek üz kabinetığızda tatarça süz çığarudan qurqıp utıra idegez bit, ä Mäxmüt abıynıñ yartı ğömere üzeşçän sänğät kollektivları belän säxnädä uzdı”, dide ul.
Älbättä, böten ğömeren “iketellelek” bayrağı astında ana telen qorıtuğa bağışlağan häm şunıñ öçen “atqazanğan” isemenä layıq bulğan Lyudmila Konstantinovna Xösnullina kebeklärneñ Qazanda millätpärvär sıyfatında bäyräm itüen qabul itü qıyındır şul. Läkin mondıy fikerlär iğtibarğa alınmadı.
Şöker, dilär “Tuğan tel” oyışması aktivistları, delegatlar arasında millätebezneñ kürke bulıp sanalırlıq şäxeslär dä bar: Xanäfi Ramazanov, Mönirä Djumayeva, Roza Äxmätcanova, Ğimran Xismätullov, berniçä milli canlı maltabar...
“Azatlıq” radiosı, Ayrat İbrahim, Sember
