Başqortstandağı tanılğan tatar ğalime, etnosäyäsät belgeçe İldar Ğabdrafıyqov şimbä könne Germaniägä eş säfärenä kitä. Anda ul Berlinda ütäçäk xalıqara kiñäşmädä qatnaşaçaq häm çığış yasayaçaq. Berlinda 25-31 iyül könnärendä Urta häm Könçığış Awropanı öyränüçelärneñ VII xalıqara kongressı ütä. Biş yılğa ber märtäbä ütüçe şuşı xalıqara cıyınnıñ monnan elgärese Finländiäneñ Tampera şähärendä ütkän ide. Anısında da Ufa ğalime İldar Ğabdrafıyqov qatnaşıp çığış yasağan ide. Äle Berlinda ütäçäk kongressta İldar äfände Yaponiä ğalimnäre belän berlektä äzerlägän «Bügenge Rusiäneñ ictimaği-säyäsi tormışında İslam» dip isemlängän proyektnı täqdim itäçäk. Üzeneñ ayırım äzerlägän «İslam häm Başqortstandağı bügenge etnosäyäsät» dip atalğan dokladında İldar Ğabdrafıyqov Başqortstanda İslamnıñ totqan urını häm anıñ etnosäyäsätkä yoğıntısı xaqında mäğlümatlar tuplağan. Kongresstağı ayırım ber seksiädä çığış yasap, şul mäğlümatlar belän urtaqlaşaçaq ul. Germaniägä kitär aldınnan, bez İldar äfände belän oçraşıp, qısqa ğına äñgämä qorıp aldıq. (Äñgämäne Azatlıq dulqınnarında comğa könne tıñlağız)
İldar äfände fikerençä, Başqortstanda tatar belän başqort xalıqlarınıñ duslığın saqlawda dinebez İslam kiläçäktä dä zur rol' uynıy ala. Monıñ öçen din ähelläre barı tik säyäsi köçlär häm respublika citäkçelege qulında qurçaq qına bulmasqa tieş.
