Tatar däwlät gumanitar universitetı belän Tatar Amerika töbäk institutları möstäqilleklären yuğalttılar dip sanarğa bula. Comğa “Tatmedia”da uzğan matbuğat oçraşuına alarnıñ rektorların çaqırıp ta tormağannar. Bu xäl jurnalistlarnı da borçıdı häm alar bu sorawnı
Tatarstan Mäğärif häm fän ministrı Räis Şäyxelislamovqa da birdelär.
Maxsus tatar awılları öçen uqıtuçılar äzerläwçe, Tatarstannan çittäge yäş millättäşçälärebezgä berençelärdän bulıp kvota birä başlağan Gumanitar institut rektorı xaqında “Ul inde matbuğat wäkilläre belän küp aralaştı, anıñ yanına barıp ta kilergä bula” dielde.
Gumanitar institut belän Amerika töbäk institutı yaña uqu yortı qanatı astına kertelde dielde. Çınlıqta monı kübese elekkege pedagogika universitetı bu uqu yortların üz eçenä yottı dip qabul itä. Matbuğat oçraşuında Räis Şäyxelislamov “Kiläçäktä yaña uqu yortı ğomumän uqıtuçılar äzerläwne azaytıp, bügenge zamanda qıtlıq bulğan belgeçleklärgä kübräk iğtibar biräçäk” dip bilgeläde. Räis Şäyxelislamov
Respublika Xalıqara elemtälärne arttıra bara. Bezdä töbäklärne öyränüçelär az. Bu belgeçlärne äzerläw buyınça universitetqa möräcäğät itäçäkbez. Küp telle respublika bulğanlıqtan, milli pedagogika, milli psixologiä buyınça belgeçlär kiräk. Alarnı äzerläw dä bulaçaq. Uqıtuçılar äzerläw azayaçaq. Ämma bez kinättän genä kimetä almıybız. Bez monı tora-bara xäl itäçäkbez. Çönki bu awır eş. Yaña uqu yortı federal'' qaramaqtağı universitet sanala. Ä Amerika töbäk institutı ul Tatarstannıqı ide. Xäzer Amerika töbäk institutı belgeçleklären yaña universitetqa kertü öçen Mäskäwdän litsenziä alırğa kiräk bulaçaq. “Mäskäw qarşı kimiäçäk. Bu eş inde bara”, - dielde “Tatmedia”da uzğan matbuğat oçraşuında Mäğärif ministrı Räis Şäyxelislamov.
Uqıtuçılarğa kilgändä, berençe yärtı yıllıqta alarnıñ barısı da äle eşläyäçäk dip belderelde. Ämma annarı alar arasında bäyge iğlan iteläçäk ikän. Monı küp kenä uqıtuçılar qısqartu dip qabul itä.
Tatar däwlät gumanitar pedagogika universitetında uqıtu nigezdä 3 teldä baraçaq. Berençe yıllarda 50 protsent qına tatar telendä uqıtılaçaq. Annan bu sannı arttıru küzdä totıla. Bu xaqta yaña universitetnıñ rektorı Cämil Nigmätov
Kiläçäktä 80 protsent belgeçlärne tatar telendä öyräteläçäk. Monda biologiä, matematika ğına tügel, ä mendjment kebek fännär dä öyräteläçäk.Matbuğat oçraşuında yaña uqu yortında belem alaçaq çittäge tatar yäşläre öçen maxsus tulay toraq buldırıla dide. Läkin şunı bilgeläp uzarğa kiräk, uzğan yıllarda çittän kilgän iñ küp yäş millättäşlärebez Tatar däwlät gumanitar institutın saylıy ide. Bötendönya tatar kongressı başqarma komitetı beldergänçä, bıyıl barı 3 keşe genä anda kererä teläk beldergän. Amerika töbäk institutına ğomumän ber keşedän dä ğariza kermägän. Kongressta monıñ säbäben totrıqlılıq bulmawdandır dip añlattılar.
Landış Xarrasova
