Samarada çığa torğan “ Berdämlek” häm “ Azan” gäcitläre milli qaharmannar oyıştırğan bäyrämnärebez turında yazıp kilälär, şulay da ayırım jurnalistnıñ bäyräm turındağı fikerläre härwaqıtta da oyıştırılğan tantananı tulısınça taswirlap beterä almıy. Gäcitä möxärrirlären dä añlap bula, temalar küp, ä gäciteneñ urını çikle.
Tatar bäyrämen tulısınça yaqtırtu niätennän “ Tuğan tel” isemle ölkä tatar cämğiäte häm Samara şähär milli- mädäni möxtäriäte Samarda uzdırılğan tatar tantanaları turında “ Azan”nıñ maxsus sanın çığarırğa bulğannar. Şundıy maxsus san “ Yalqınlı yäşlek” ansambleneñ 35 yıllığına bağışlanğan bulsa, çirattağı maxsus san Samar ölkä Sabantuyına bağışlap çığarıldı.
Berençe bittä gubernator Konstantin Titov, Tatarstan İlbaşı Mintimer Şäymiev, Sarman rayon türäse Näfis Zakirov täbriknamäläre urın alğan. Şunda uq Poxvistnevo şähärendä yäşäwçe ukrain şağire Pavel Rudenkonıñ “ Sabantuy” isemle şiğere dä urın tapqan.
Samar şähärendäge Sabantuylar tarixına küzätüne “Tuğan tel” cämğiäte ideologı Azat Nadirov yasağan.
Gäciteneñ 2- nçe bite tulısınça tatar köräşenä bağışlana, şul uq bittä tik köräşkä matdi yärdäm kürsätkän sponsorlarnıñ isemlege birelgän, ä sänğät'kä, uyınnarğa yärdäm itüçelär isemlege sänğät, uyın büleklärendä iskä alına. Gäciteneñ dürtençe bite tulısınça yäşlär turında, iseme dä “ Bez kiläçäkle” dip atala. Gäcit bitlärendä Sabantuy mäşäqätlären üz öslärenä alğan tatarlarnıñ isem- familiäläre kürsätelgän. “ Azan” gäcitçäseneñ Samaradağı 17- nçe Sabantuyğa bağışlanğan sanı 2000 danä belän basılğan häm matdi çığımnarnı üz östenä Samar şähär milli- mädäni möxtäriäte citäkçese Äxmädulla uğlı Cämil Wälullin aldı. Samar milli xäräkäte citäkçeläre belderüençä, maxsus sannar kiläçäktä dä tatar tormışındağı waqiğalarğa bağışlap çığarılaçaq.
