Accessibility links

шимбә, 23 сентябрь 2017, Казан вакыты 19:45

Zilä Wälieva: Salix Säydäşev häykäle nigezenä küplärneñ köçe, tırışlığı salınğan


Qazanda 12 avgustta tatar cämäğätçelege küptän kötkän ber waqiğa bulaçaq. Comğa könne başqalanıñ üzägendä, Kamal teatrı qarşında tatar xalqınıñ bilgele şäxese, mäşhür kompozitor Salix Säydäşevkä häykäl açılaçaq. Äytergä kiräk, Säydäşevkä häykäl quyu kiräklegen milli cämäğätçelek inde menä niçä yıllar buyı isbatlap kilde. Sınnıñ nindi bulırğa, qayda urnaşırğa tieşlege turında bäxäslär, häykälneñ qiäfäte buyınça bäygelär dä az bulmadı. Läkin, şuña da qaramastan, Qazan şuşı köngä qädär tanılğan kompozitornıñ sınına iä bula almadı. Şuña da, 12 avgustta açılaçaq häykälgä iğtibar da, xörmät tä zur bulaçaq. Tantanalarğa zur qunaqlar da küp kiler, dip kötelä. Mintimer Şäymiev tä älege çarağa cıyına ikän. Pänceşämbe irtäsendä Yaña ğasır radiosı efirında respublika premyer-ministrı urınbasarı, Mädäniät ministrı Zilä Wälieva da Säydäşevkä quyılğan häykäl häm anı açu tantanası turında söyläde.

Älege häykäl nigezenä bik küp keşeneñ köçe, teläge, tırışlığı salındı. Bu tanılğan kompozitorğa häykälneñ nigeze nıq buluın kürsätä. Säydäşevkä häykäl näq Tuqay belän yänäşä. Bu oçraqlı da tügel. Çönki tatar ädäbiäten Tuqaysız küz aldına kiterep bulmağan kebek, bezneñ muzıka sänğäteneñ däräcäsen dä Salix Säydäşevsız bilgeläp bulmıy

Şulay itep, 12 avgustta, köndezge säğät berdä qazanlılarnı Salix Säydäşevkä häykäl açılu uñayınnan bik matur mädäni çara kötä.

Şul uq könne ütäçäk tağın ber açılışnı da iskä almıyça bulmıy. 12sendä räsmi räweştä yaña eşli başlayaçaq Tatar däwlät humanitar pedagogika universitetı açılaçaq. Älege uqu yortı tiräsendä barğan bäxäslär dä bik küp buldı. Kemnärder anı, menä nihayät küptän kötelgän Milli universitet açıla, dip xuplasa, ikençelär, milli yuğarı uqu yortı ideasın xarap ittelär, küpme suzıp, suzıp ta anıñ urınına tağın ber ğadi uqu yortı açtılar, dip qänäğätsezlek belderüçelär dä az bulmadı. Üzeneñ pänceşämbe könne yasağan çığışında Zilä Wälieva bu xaqta üz fikeren äytte.

Yaña universitet turında şiklänülär dä, bäxäslär dä küp buldı. Läkin minemçä, bu zur eşkä çın bäyäne kiläçäk buınnar ğına birä alaçaq. Çönki älege eşneñ böten zurlığın xäzer añlap ta beterep bulmıy. Zur eşkä totınğanda bäxäsläşep torunıñ mäğnäse yuq. Böten belemne, tırışlıqnı nigezne nığıtuğa köç salu urınına bäxäsläşep yatu, eşkä genä qomaçawlıy

12 avgustta Qazanda açılğan universitet Rusiä yuğarı uqu yortları arasında iñ örelärneñ berse bulaçaq. Anda kiläçäktä 5 meñgä yaqın student rus häm tatar, ä yaqın arada ingliz telendä dä belem alaçaq. Alar milli cämäğätçelekneñ ömeten aqlap, tatar xalqınıñ kiläçäge bula alırmı, digän soraw bügengä äle cawapsız qala. Läkin här könne uqırğa barğanda Salix Säydäşev häykäle yanınnan ütep kitkän keşe, millät tormışın, millät yazmışına bitaraf bulmas, çönki ul bezneñ xalıqnıñ tanılğan şäxesläre ürnägendä tärbiälänerlär, dip sanıy Zilä Wälieva. Kem belä, bälki näq menä şuşı universitettan çıqqan yäşlär Salix Säydäşev häm başqa mäşhür, tanılğan millättäşlärebez kebek ük, tatar mädäniäten, fänen bayıtıp, anı dönya däräcäsenä kütärergä yärdäm itärlär. Bälki alarnıñ isemnäre dä Säydäşev iseme, anıñ köyläre kebek kiläçäktä yañğırap torır.

Gölnaz İlgizär

XS
SM
MD
LG