Ayrat Waxitov iseme xäzer bik küplärgä tanış. Çallıdağı Täwbä mäçetendä imam bulıp torğan bu yegetne, Awğanstanda suğış barğanda, Amerikan ğäskäriläre qulğa alğannar ide. Taliplar belän bergä suğışuda ğäyeplänep. Ul äsirlär totıla torğan Guantanamo bazasında totılğan ide. Amierikannar Ayrat Waxitov häm anıñ kebek ük Avğanstanda qulğa alınğan berniçä rusiäleneñ ğäyeben raslıy almağaç, alar Rusiägä qayttı.
Läkin, Rusiädä alar irekle tormışqa tienä almadılar. AyratWVaxitov küptän tügel genä Mäskäü radiolarınıñ bersenä birgän intervyusında, Rusiädäge tormışınnan bik qatı zarlanğan ide. Şul uq Mäskäwdä Ayrat Waxitovnı häm Röstäm Äxmärov isemle yegetne tağın qulğa aldılar. Rusiädä iñ köçle fälsäfäçelärdän sanalğan ğalim Gäydar Camalnıñ fatirınnan alar yuqqa çığa. Mäğlümat agentlıklarına Gäydar Camal, yuqqa çıqqan qunaqların bik nıq ezläwe turında xäbär itkän ide.
Alar tabıldı. Qazanda ber tikşerü izolyatorında. Mäskäwdä qulğa alınğan Ayrat Waxitov belän Röstäm Äxmärov, Tatarstan cirendä terraktlar yasawda ğäyeplänälär. Tatarstan prokurorı yärdämçese İldar Möxämmätcanov Azatlıq radiosına bolay dip belderde
Ayrat Waxitov belän Röstäm Äxmärov Tatarstanda terrakt yasawda ğäyeplänälär. Qulğa alınu mäxkämä qararı belän buldı, qayçan töp ğäyepläw bulaçağın äle äytü qıyın. Monnan tış, alarnıñ Awğanstanda amerikannar tarafınnan äsir itelüläre Rusiädä qulğa aluğa säbäp tügel Eş şunda ki, Ayrat Waxitov Guantanamoda möselman äsirlären mısqıl ittelär dip beldergän ide. Qayber küzätüçelär, alarnıñ xäzer Rusiädä qulğa alınuları Amerika üteneçe buyınça üç itü digän süz tarattılar. Prokuror yärdämçese monı inqär itä.
Älege eş ni belän tämamlanır äle bilgesez. Eş şunda ki, Tatarstanda mäsälän Xizbuttaxrir oyışması liderı dip qulğa alınğan Alişer isemle üzbäk watandaşı, mäxkämä barışında aqlandı. Ayrat Waxitov belän Röstäm Äxmärov eşe dä şulay bulmas dip kem äytä ala.
Räfis Cämdixan
