Accessibility links

Кайнар хәбәр

"Hizb-ut-Tahrir" terrorğa qarşı köräşne bergä alıp baruğa öndi


Idel-Uraldağı tıñlawçılarğa "Hizb-ut-Tahrir" iseme xäzer inde yaxşı tanış - Rusiä iminlek köçläre soñğı aylarda berniçä ölkädä şul xalıqara oyışmağa bäyle buluda ğäyepläp distälägän möselmannı qulğa aldı, alarnıñ qayberläre xätta törmä cäzasına da xökem itelde. Moña qädär eşçänlegen açıqtan-açıq alıp barğan Britaniädä dä, London şartlawlarınnan soñ "Hizb-ut-Tahrir" eşen tıyuğa öndäwlär arttı. Yäkşämbedä Londonda uzğan qorıltayında şuşı oyışma üzeneñ terror häm köç qullanu alımnarına qarşı buluın qabatlap, britan xökümätenä yalğış mäğlümat birelgän bulsa kiräk dip belderä häm anı aralaşuğa ğına tügel, terrorğa da bergäläşep köräşügä çaqıra.

Mäğlüm "Hizb-ut-Tahrir" oyışması töp maqsat itep, bar möselman dönyasında yänä Urta ğasırlardağı xälifätne torğızunı quysa da, ul moña fäqät tınıç yullar belän, qoral qullanmıy ğına ireşüne alğa sörä. Näq menä şul säbäple älege oyışma, Üzäk Aziädäge avtoritar däwlätlär häm Rusiädän ayırmalı bularaq, Britaniädä üz eşen açıqtan-açıq alıp bardı. Yaña xälifät xalıq tarafınnan saylanğan wäkillär tarafınnan idarä itelep, andağı tormış islam qanunnarına nigezlänäçäk, dip belderä "Hizb-ut-Tahrir"neñ yulbaşçıları. Şularnıñ berse Ğabdul Waxit, oyışma hiç kenä dä Könbatışqa qarşı köräş alıp barmıy, aña yanamıy, ul köç qullanuğa häm terrorğa qarşı, şuña da bez Britaniädä oyışma eşen tıyuğa qarşı, di:

Audio, Ğabdul Waxit

"Bez üz eşçänlegebezne däwam itärgä telibez häm eşne tıyuğa qädär citkermäs öçen küp närsä başqarabız. Şul mäğlüm, bezneñ eşne möselman dönyasındağı diktator wä tirannar ğına tıya, ämma firkäbez şuña da qaramastan üzeneñ tınıç säyäsi eşen däwam itä", di "Hizb-ut-Tahrir"neñ başqarma xäyäte äğzası Ğabdul Waxit. Anıñ süzlärenä qarağanda, bigräk tä qatı ezärlekläwlärgä "Hizb-ut-Tahrir" äğzaları Üzbäkstanda duçar itelä.

Audio, Ğabdul Waxit

"Ändicandağı waqiğälärdän soñ bez, bolar barısı da Üzbäkstannıñ üz xökümäte tarafınnan "Hizb-ut-Tahrir" äğzaların yuq itü öçen uylap eşlängän digän fikergä kildek. Andağı çığanaqlardan alınğan mäğlümatqa tayanıp, bezneñ anda 7 meñläp äğzabız üterelde dip äytep bula. Bezneñçä, bu üzbäk xakimiate dönya mediasınnan yäşergän küpläp üterü oçrağı bulıp tora", di Ğabdul Waxit. "Hizb-ut-Tahrir" oyışması möselman dönyasındağı xäzerge xökümätlärne tanımıy, Könbatış cämğiatläre qorılğan parlament demokratiäsen kire qağa häm yähüd däwläte bularaq İzrailgä qarşı çığa, ämma berük waqıtta üzeneñ yähüdlärgä qarşı bulmawın, alarnıñ xälifättä tınıç ğömer itüen belderä. Londondağı qorıltay "Hizb-ut-Tahrir"neñ xälifätne niçek küzallawına bağışlanğan ide. Anda süz oyışmanıñ britan xökümäte belän aralaşuı xaqında da bardı. "Hizb-ut-Tahrir"neñ matbuğat wäkile İmran Waxid, xakimiat oyışmanı tıyu tügel, ä anıñ belän terrorğa qarşı niçek itep bergä köräşü yulların bilgelärgä tieş dip belderä:

Audio, İmran Waxid

""Hizb-ut-Tahrir" ul açıq ber oyışma. Bez şunı sizäbez ki, britan xökümäte, başqa cirlärdäge xakimiat möselman mäxälläsendä terrorğa qarşı citdi köräşergä teli ikän, ul anı köç qullanuğa qarşı çıqqan "Hizb-ut-Tahrir"ne tıyıp tügel, ä anıñ belän aralaşu başlap alıp barırğa tieş. "Hizb-ut-Tahrir" bu xaqta härkem belän bergä utırıp fiker alışuğa äzer", di İmran Waxid, "Hizb-ut-Tahrir"neñ matbuğat wäkile.

Kärim Kamal
XS
SM
MD
LG