Säfär barışında Çeçen Respublikası Prezidentı Alu Alxanov belän Başqortstan Prezidentı Mortaza Räximovlar üzara xezmättäşlek turında kileşü imzaladılar. Alu Alxanov Başqortstan Eçke eşlär ministrlığında ber törkem militsiä xezmätkärlärenä büläklär tapşırdı. Ul iñ başta Başqortstan Eçke eşlär ministrı Rafail Diwayıvqa üzläreneñ iñ yuğarı büläkläre – “Çeçen Respublikasına xezmätläre öçen” isemle medal tapşırdı. Çeçnyäda tärtip urnaştıruda qatnaşqan biş milisiä polqovniğına “Çeçen Respublikasın yaqlawçı” isemle medallär, öç milisiä xezmätkärenä Çeçen Respublikası Prezidentınıñ Räxmät xatların tapşırdı. Büläkläw çarası axırında Diwayıv Alxanovqa başqort balı, anısı isä ministrğa xäncär büläk itte. “Duslıq poyızı”nıñ aldağı tuqtalışı Qazanda bulaçaq.
