Yoqısız tönnär, rizıq ütmägän könnär awıl xucalığı xezmätçännäre öçen artta qaldı diärgä bula. Bu comğada 5000gä yaqın igençe, terlekçe, mexanizator, kombayner häm başqa cir eşe belän bäyle hönär iäläre başqalabıznıñ “Basket-Xol” sport sarayına uñış bäyrämenä cıyıldı. Bäyrämdä Rusiäneñ xisap palatası räise Sergey Stepaşin, Tatarstan respublikası prezidentı Mintimer Şäymiev, awıl xucalığı häm azıq-tölek ministrı Marat Äxmätov häm başqa däräcäle qunaqlar bar ide. “Basket-Xol”da qara käçtümle citäkçelär belän bergä ozaq yıllar buyı kombayner bulıp eşlägän abzıylarnı da aq külmäk qara kostyum belän kürep buldı. Alar öçen bügen bigräk tä dulqınlandırğıç minutlar ide.
Aldınğı rayonnarnı büläkläw aldınnan respublikanıñ här rayonı üz uñışların täqdim itep, teatral'läşterelgän küreneşlär kürsätte. Säxnägä berençe bulıp çıqqan balalarnıñ qullarında ürä torğan at räseme töşerelgän şarlar buldı. Bu - Nurlat rayonı ide. Şundıy uq küñelle häm yarımşayan räweştä Teläçe häm başqa rayonnar täqdim itelde. Här rayonnı täqdim itü töbäkneñ gimnı yañğırawı belän ürelep bardı.
Bäyräm ikmägen qabul itkännän soñ respublikabıznıñ igençelärenä Tatarstan prezidentı Mintimer Şäymiev üzeneñ zur räxmäten citkerde.
Prezident üz çığışında ağımdağı yılnıñ respublika häm il tormışı masştabında zur ähämiätkä iä buluın assızıqladı. Ambarıñda aşlıq bulğanda ğına, teläsä nindi däräcädä, teläsä kem belän kükräk kierep söyläşep bula dide prezident. M.Şäymiev respublika iqtisatında raps citeşterü häm eşkärtü proyektı, awıl xucalığına investorlar iğtibarı artuı turında söyläde. Annarı ilbaşı awıl xucalığı ölkäsendä yuğarı näticälärgä ireşkän rayonnarnı büläkläde.
Uraqnı bıyıl da berençelärdän bulıp nurlatlılar tämamladı, alar 201,5 meñ tonna uñış cıyıp aldılar. Nurlattan azğa ğına qalışıp, bualılar 200,3 tonna ikmäk suqtırdı. Arça 193,5 tonna ikmäk belän öçençe urınğa çıqtı. Şulay uq zur uñış alğan Aqtanış, Baltaç, Çirmeşän, Quqmara, Çüpräle, Tübän Qama, Yäşel Üzän, Saba, Ätnä, Teläçe rayonnarın da bilgeläp üttelär.
Bäyrämdä qatnaşqan Bawlı şähäreneñ idärä räise Rinat Fäxriev isä Bawlı yağınıñ bıyılğı uñışın bolay bäyäläde:
Bezdäge awıl xucalığı näticälären yuğarı dip äytep bulmıy. Başqa rayonnar belän çağıştırğanda, Bawlı qalışa. Säbäbe – naçar hawa torışı. Uñış bäyräme ütte dä kitte. Läkin bäyrämdä telgä alınmağan Layış, Balıq bistäse, Piträç häm başqa qayber rayonnarnıñ başlıqları uñış bäyrämendä alğı rätlärdä utırsalar da, bu rayonnarnı kiläçäktä aldınğılar rätendä kürep bulırmı, yuqmı? Ansı bilgesez. Gärçä bu başlıqlarnıñ awıl xucalığı ölkäsendä ireşkän uñışları öçen digän däräcäle isemnäre bulsa da.
Röstäm İsxaqi. Al'bina Zäynulla
