Uraza bäyräme belän möselmannarnı ölkä häm şähär citäkçelege täbrikläde. Moña qädär “Ömet” gäzitendä barı tik räsmi tanılğan Säwbän xäzrät Söläymanovqa ğına täbrik süze öçen urın birelä ide. Bu yulı Fatıyx xäzrät Aliullovnıñ täbrige dä xalıqqa citkerelde.
Atna axırında xakimiät wäkilläre, arxiepiskop Prokl häm ike möfti dä qul quyğan urtaq kileşü qabul itü küzdä totıla. Xaqimiät tarafınnan tözelgän proyektqa din ähelläre dä üz täqdimnären äzerläp birdelär.
Ramazan ayında bulğan, dinebezgä qağılışlı tağın ber waqiğağa tuqtalıp ütü urınlı bulır kebek. Mäläkäs şähäreneñ Cämiğ mäçetneñ eşli başlawına 110 yıl tulu uñayınnan anda zur tantana uzdı. Maqsatı isä, bäyräm itü tügel – ozaq yıllar buyı törle maqsatlarda qullanılğan häm şunlıqtan bik tawşalğan mäçet binasın tözätü çaraların kürü.
Şähär avtonomiäse räise Rival' İdrisov ğözere buyınça, şähär merı Aleksandr Moloçkov Popeçitel'lär şurası räise wazifaların üz östenä aldı. Ä ölkä avtonomiäse räise wazifaların waqıtlıça başqaruçı Roza xanım Äxmätcanova:
“Sergey Morozov çorı Mäläkästä tatar mäktäbe açu belän tarixqa kerep qalsa, Aleksandr Alekseewiç epoxası - mäçet binasın yañartu belän xalıq xäterendä qalır”,- dide.
Ä Ramazan ayınıñ niçek uzuına kilsäk, möfti Fatıyx xäzrät qänäğät. “Namaz uquçılar, uraza totuçılar, tarawix namazına yörüçelär sanı bıltırğıdan kübräk buluı şunı kürsätä, - dide ul. Tağın ber ğibrätle küzätü. Bıyıl Ramazan ayında nikax-tuylar bulmağan. Ä Uraza ğayıtennän soñ nikax uqırğa çaqırular küp cıyılğan.
Awıllarğa kilsäk, xällär törleçäräk. Yäşe-qartı därräw uraza totqan awıllar da, araqıdan ayırıla almağan bändälärgä bay bulğan awıllar da bar. Ä menä çuaşlı, urıslı, tatarlı Zelenaya roşça awılında, Mäxmüt xäzrät Kadraliev äytüençä, bu ayda araqığa qağılğan millättäşlärebez küzgä çalınmağan. Läkin anı xäwefländerüçe küreneş tä bar: mäçetkä yörüçe qartlar azaya. Ülüçelär urınına balaçaqta iman iñderelmägän yäşräk buın qala, läkin alar belän eş alıp baru ifrat ta qıyın. Özelgän buın.
Läkin Mäxmüt xäzrät töşenkelekkä birelmi: mäçet qaramağında eşläp kilüçe mädräsägä mäktäp balaları bik teläp yörilär, imanlı bulıp üsälär. Menä şul balalarnıñ özelgän buınnarnı totaştıruına ömetlänep bula. Bu awılğa şundıy uq qatnaş xalıqlı tiräk-yaq awıllardan din qärdäşlärebezneñ Ramazan ğayıtenä kilüläre tağın da tırışıbraq eşlärgä etärgeç birä, dide Mäxmüt xäzrät Kadraliev.
Ayrat İbrahim, Sember.
