Omski ölkä tatar milli-mädäni möxtäriäteneñ kön qadağı bulıp torğan probleması – üze urnaşqan bina öçen arenda, cılılıq häm başqa çığımnarnı tüläw mäs’äläse haman da xäl itelmi. Möxtäriät citäkçelegeneñ törle däräcälärdäge eşmäkärlärgä, qayber predpriätielär citäkçelärenä xatlar yazıp, cıyılğan burıçlarnı qaplawların sorawı, şähär xakimiätenä tüläwlärne byudjet isäbenä kertülären sorap qat-qat möräcäğät itüe dä cawapsız qaldı. Näticädä inde salqınnar başlanuğa qaramastan kommunal xucalıq xezmäte binağa cılılıq birüne tuqtatqan ide. Şulay da, oktäberneñ soñğı könnärendä iğanäçelär yärdäme belän burıçlarnıñ berniqädär öleşen tülägännän soñ, inde kisep taşlağan cılıtqıç torbaların totaştırıp, binağa cılılıq birügä ireşelde. Döres, bu waqıtlı çara, ber märtäbä kürsätelgän yärdäm. Qalğan burıçlarnı, aldağı çığımnarnı tüläw zur soraw astında qala birä. Bu çığımnarnı tüläwgä nindi bulsa da öleş kertü teläge belän “Umırzaya” tatar-başqort ansamble yäkşämbe könne bu binada konsert programması belän çığış yasadı. Konsertqa bilet satıp alu – möxtariätkä yärdäm itügä tiñ dip, xalıq arasında aldan añlatu eşläre alıp barılsa da keşe bik az buldı. Konserttan kergän tabış möxtariät urnaşqan bina öçen bulğan barlıq tüläwlärneñ 3%-ın da qaplarğa citmäde. Älbättä, arenda mäs’äläsen mondıy yul belän çişärgä tırışu, aptırağannan artı belän külgä çumğan ürdäkne xäterlätäder. Moxtariät älegä, kem äytmeşli, pozitsiälären birmi, binada utıruın däwam itä. Bilgele ki, yaña yıldan kommunal' xezmät kürsätü öçen tüläwlärneñ 100%-ı da qullanuçı cilkäsenä töşäçäk. Moxtariät annan soñ da binada qala alırmı, ansı zur soraw astında.
Omski filarmoniäse säxnäsendä tatar qızı
Omskida ütkän tağı ber konsert turında mäğlümatnı tıñlawçılar iğtibarına citkeräsebez kilä. Şuşı könnärdä genä şähärneñ zur konsertlar zalında ölkä filarmoniäse cırçısı Zölfiä Sadıyqovanıñ “Mäxäbbät moñnarı” dip isemlängän ayırım konsertı buldı. Konsertta Zölfiä tınlı orkestrğa quşılıp rus xalıq cırları, romanslar, ariälär başqardı. Älege konsert cırçınıñ zur säxnädä berençe ayırım çığışı ide. Şuña qaramastan zal xalıq belän tulı buldı, häm tamaşaçı Zölfiäne cılı qarşıladı, çäçäklärgä häm qaynar alqışlarğa kümde.
Şunı da iskä töşerep kitärgä kiräk, säxnägä berençe adımnarın Zölfiä monnan ber 10 yıllar elek “Umırzaya” ansamblendä, törle cır konkurslarında qatnaşa, Omskinıñ Şabalin isemendäge muzıka uçilişçesında uqi, Qazan konservatoriäsendä Älfiä Zahidullina klassında belem ala. äzer Zölfiä Sadıyqova Omski däwlät filarmoniäse cırçısı. Tatar cırların yaratsa da, rus mädäniätenä xezmät itü säbäple anıñ repertuarında älegä tatar cırları yuq. Döres, tatar moñnarın ul küñel türendä yörtä häm kiläçäktä tatar tamaşaçısı öçen konsert äzerlärgä xıyallana. Berençe tatar cırların Zölfiä bala çağında äbisennän işetkän. Älege konserttan soñ bulğan äñgämädä ul äbisennän öyrängän ber cırnı isenä töşerep aldı.
Rozaliä Sayganova, Omski.