2 noyäber könne Tatarstan Prezidentı Mintimer Şäymiev Qazanda “Äkiät” tatar däwlät qurçaq teatrı öçen yaña bina proyektlau häm tözü mäs’älälärenä bağışlanğan kiñäşmä ütkärelde.
Bilgele bulğança, küptän tügel TR Däwlät Şurasınıñ unsigezençe utırışında "Äkiät" teatrı yazmışı turında da süz bulğan ide. Çönki Qazannıñ 1000 yıllığın bäyräm itügä äzerlek maqsatınnan tözeläçäk obyektlar programmasına kertelsä dä, teatrnıñ yaña bina mäs’äläse çişelergä ölgermäde. Prezident Mintimer Şäymiev üzeneñ wäğdäsen istä totıp, yubiley planınnan töşep qalğan qurçaq teatrın tözüne üz kontrolenä aldı. Tiz arada teatr binasınıñ proyektı eskizları äzerlände. Çärşämbe könne şuşı eskiz häm maketlar Qazan Kirmänendä Prezident qatnaşlığında tikşerelde. Täqdim itelgän proyektlarnıñ berse dä Prezidentqa oşamağan, ämma bu kiñäşmäneñ töp intrigası proyekt belän tügel, ä teatr tözeläse cir mäydanı belän bäyle.
Bezgä bilgele bulğança, qurçaq teatrınıñ yaña binası öçen urınnı Mintimer Şäymiev üze saylağan häm ul Mullanur Waxitov häykäle belän Ermitaj baqçası arasında Nekrasov uramınıñ asqı öleşendä tözelergä tieş. Ämma kiñäşmädä şul bilgele buldı, Qurçaq teatrı tözeläçäk älege cir satılğan ikän. Ul “Qızıl şärıq” sıra şirkäteneñ milke genä tügel, xätta anıñ ustav fondına kertelgän. Dimäk, bu cirne satıp alu, kire qaytaru bik qıyın bulaçaq. Prezident bu kötelmägän xälne töşengäç şähär başlığı Kamil İsxaqovqa kisken tänqit audırğan. Şähär citäkçelege berkem belän dä kiñäşmiçä üzäktäge iñ qimmätle häm tarixi urınnarnı säwdä kompaniälärenä satıp cibärgän. Şähär başlığı bulıp saylap quyılğan Kamil İsxaqov cämäğätçelek aldında şaqtıy uñaysız xäldä qalıp, Prezident näfrätenä duçar bulğan. Şulay da balalar teatrı öçen uñası cir qayda bulır digän soraw açıq qaldı. Başbaştaqlıq, korrupsiä temasımı, ällä qurçaq teatrı häm balalarnı ruxi yaqtan kamil itep üsterü temasımı qalquraq kürenäçägen xäzergä äytep bulmıy.
Gölnaz Şäyxetdinova
