Tömän şähärendäge “Şahzadä” aş yortına 150 aq yaulıqlı apa häm käläpüş kigän babay cıyıldı. Bäyräm tabını artına utıruçılarnıñ barı tik unlabı ğına yäş yeget häm qız ide. 24 yäşlek Artur Xäyrullin mäcles başlanğançı mäçetkä yöri torğan üz işläre kürener mikän dip kötep qarağan ide, tabın artına aña ölkännär belän bergä utırırğa turı kilde. Artur äytüençä, tabın aşın kübräk ölkännär yarata şul. Ä menä bügen Tömänneñ cämiğ mäçetendä isä Ramazan bäyräme namazında meñ keşeneñ yartısı 30 yäşkä çaqlılar bulğan. Tağın 20 protsentı 50 gä çaqlı urta buın. “Din totuçılar soñğı berniçä yıl eçendä bik yäşärde”,- di Artur.
“Şahzadä” aş yortında ütkän mäclestä iñ ölkän keşelärneñ berse Wağay rayonı Qazanlı awılınnan kilgän 82 yäşlek Aytmöxämmät abıy Yusıypov ide. Rusiäneñ Aziä öleşe möselmannarınıñ diniä idäräseneñ Tömän töbägendäge başlığı Fatix xäzrät Ğarifullin Aytmöxämmät abıynı: “Xacdan ul 80 ne uzğan buluına qaramastan tuğan yaqlarında taratır öçen 60 Qor’än kitabı kütärep qayttı. Wağay rayonında dinne taratu öçen awıldan awılğa yöri”,- dip tanıştırdı.
Uraza bäyräme mäclese üzenä kürä ber dini kiçä räweşendä ütte. Fatix xäzrät Tömän möselmannarın qotlap Mäskäwdän möftilär şurası başlığı Rawil xäzrät Ğäynetdinnän, Aziä öleşe diniä idäräse möftie Näfiğulla xäzrät Aşirdan, Mäskäwdäge Uraza bäyrämen böten Rusiägä kürsätü çığımnarın üz östenä alğan Ğabdelvaxit Niäzovtan, Ufa diniä idäräsennän kilgän telegrammalar belän tanıştırdı. İslam dinenä yärdäm itkän Tömänlelärgä räxmät yazuları häm Qor’än kitapları tapşırdı. Fatix xäzrät tırışlığı belän bäyräm mäclesläre 10 nçı yıl uza inde. Xäzrät süzlärençä, soñğı yıllarda mäcleslär öçen yärdäm itüçe eşquarlar arta bara.
Mikrofon yanına kilep räxmät süzläre äytüçelär dä, bäyräm belän täbrikläwçelär dä küp buldı. Cirle şağir Zahit Aqbüläkov Ramazan ayına bağışlanğan şiğeren uqıdı.
“Rusiä patriotları” säyäsi partiäseneñ äğzası Rinat Nasıyrov “Amänät” xäyriä fondınıñ moxtaclarğa härwaqıt yärdämgä äzer ikänlegen belderde. Ul cıyılğan xalıqqa:
“Kürşe tiräläregezdä yärdämgä moxtaclar bulsa, adresların qaldırığız, bez yıl buyı xäldän kilgän qädär bulışıp torırıbız,- dide.
“Şahzadä” aş yortın ikençe törle bäyrämnär sarayı dip tä yörtälär. Monda tuylar, törle oyışmalarnıñ bäyräm kiçäläre uza. Xucası Färxäd Ali oğlı Fäyzullaev, ul milläte belän äzerbäycan, mondıy kiçäneñ berençe tapqır uzuına üze dä söyende. Ä administratorları Pawel: “Komp'yuter uyınınnan başları çıqmıy, ulıma kürsätäm äle”,- dip küçmä kibettän İslam dine turındağı mäğlümäti wideotasmalar da satıp aldı.
Nail Alan, Tömän.
