Pänceşämbe könne, elek saylanğan deputatlar, yaña ğına deputat kenägäsen alğannar da utırışların ütkärde. Könneñ berençe yartısında, inde 7nçe eşli torğan Qazan deputatları şurası soñğı utırışlarnıñ bersen ütkärde, ä töştän soñ, yaña saylanğan munisipal xakimiät deputatları ikençe cıyılışın uzdırdı. Munisapal şurada, şähär nigezlämäse qaraldı. Elekke şurada, yañasında da, deputat bulıp torğan keşelär, köne buyı cıyılışlarda uzdırdı. Qazan şähär şurasınıñ taralır aldınnan, xäl itelmiçä qalğan mäs’älälär qalğan ide. Mäsälän alar, yañartılğan toraq-kommunal xucalıq tarifların qaradı. Kommunal tüläwlärneñ üzgärüe, ä tögälräk äytkändä artuı turındağı xäbär, Qazan xalqınıñ küñelen kütärmäyäçäk, dide şähär deputatları. «Toraqqa häm kommunal xezmätlärgä tüläw» turındağı federal standartlar Tatarstanğa inde 4 ay elek kilgän bulğan. Ämma Tatarstanda kommunal tüläwlärne ni däräcädä saqlarğa, niçä protsentqa kütärergä äle xäl itelmägän bulğan. Menä saylawlardan soñ buşağan, şähär deputatları kiläse yılğa bäyälärne qararğa buldı. Ämmä, 10nçı noyäber utırışında da xäl itep betermäde. Federal standartlarğa qarağanda, kommunal xezmätlärneñ 100 % da xalıqtan tülätü turında süz bara. Läkin şul uq waqıtta, federal qanunğa qarağanda, toraq-kommunal tüläwlär ğailä budjetınınıñ 22 % artmasqa tieş ikän. Deputatlar aldında, çığış yasağan toraq-kommunal xucalıq departamentı başlığı Evgeniy Volkov, tariflarnı üzgärtü waqıtı citte, dide. Anıñ äytüençä, gaz, elektr energiäse, cılılıq tarifları 30% artu, toraq-kommunal xucalıqta eşläwçelärneñ eş xaqların 24% arttıru, cir salımnarınıñ üzgärüe säbäple, aylıq kommunal tüläwlärneñ külämen dä zuraytırğa turı kiläçäk. Toraq-xucalıq departament başlığı Evgeniy Volkovqa , deputatlar sorawlar birep, tariflarnı töşerü öçen närsä bulsa da eşlänäme dip soradılar. Ul bu sorawğa cawap birä almadı.
Deputatlar kommunal tüläwlärne inflyatsiä küläme, yäğni 12% artırmasqa mömkin tügelme, dip soradı. Ämma bu soraw da älegä cawapsız bulıp qala. Qazan şähär deputatlar Şurası başlığı Kamil İsxaqov, utırışta qatnaşuçılarnıñ sorawların kötmiçä añlatmalar kertte. Kamil İsxaqov äytkänçä, energiä çığanaqları öçen bäyälär artqanğa kürä häm xäzer kürsätelä torğan kommunal tariflarnıñ sıyfatın şul uq däräcädä saqlap qalu öçen, bäyälärne arttırırğa kiräk. Kommunal ölkä xezmätkärläreneñ sıyfatın arttıru turında süz bötenläy barmıy ikän.Qazanlılar inde xäzer uq aylıq tüläwlär belän riza tügel. Kamil İsxaqov, andıy reaksiäne belep, cawaplı keşelärne matbuğatta añlatu eşlären alıp barırğa kiräk dide. 2006 yıldan artu barıber bulaçaq, läkin aldan äytelgän 30% tügel, ä azraq sanğa. Toraq kommunal xucalıq häm tözeleş ministrlığı wäkile cıyılışta çığış yasap, şähär rayonnardan tariflar turında täqdimnär kilgäç, respublika küläm standartlar bilgelänäçäk, dide. Aldağı yılğa, bäyä iñ kübe - 15 % artırğa tieş, dide ministrlıq wäkile.
Bikä Timerova.
