Accessibility links

Кайнар хәбәр

Rusiä: Ruslan Naxuşevnıñ yuğaluı artında närsä yata?


Nalçiktağı İslam tikşerenüläre institutı citäkçese Ruslan Naxuşevnıñ xäbärsez yuğaluına ber atna buldı. Noyäberneñ 4ndä Qabarda-Balqar respublikasınıñ FSB idaräsendä sorawda bulğannan birle annan ber xäbär dä yuq. Tuğannarı anıñ yuqqa çığuın xoquq saqlaw oyışmalarına xäbär itte. Comğa könne Rusiäneñ baş prokuror urınbasarı Nikolay Şepel Naxuşev östennän uzğan ayda uq "terrorçılıqqa qotırtu" matdäse nigezendä cinäyät eşe açılğanı turında belderde.

Rusiä matbuğatı yazuına qarağanda, elekke KGB mayorı, 47 yäşlek Ruslan Naxuşev Qabarda-Balqarda şaqtıy abruylı keşe. Sovetlar Berlege cimerelgäç yalğa çığıp eşquarlıqqa kitkän. Berençe çeçen suğışı waqıtında totıqlarnı elzäw belän şöğellängän. 90nçı yıllar axırında islam belän mawığıp kitep, Nalçikta İslam tikşerenüläre institutı oyıştırğan. Räsmi terkälmägän bu institut citäkçelegendä Anzor Astemirov belän Musa Mukojev digän keşelär dä bar. İkese inde küptän idän astına kitkän, cirle çekistlar alarnı Kabarda-Balkar islam cämäğäteneñ ruxi citäkçeläre dip sanıy. Alarnıñ äytenä qarağanda Astemirov Üktäberneñ 13ndä Nalçikta bulğan höcümnärdä häläk bulğan. Gärçä bu xäbär räsmi raslanmağan.

İptäşläre äytüenä qarağanda, soñğı waqıtta Naxuşev ta Qabarda-Balqar islam cämäğäte mänfäğtlären yaqlağan. Ber yatqan, aña radikal qaraşta torğan möselmannar da ışanğan. İkençe yaqtan, räsmilär dä ixtiram itkän. Qabarda-Balqar respublikasınıñ yaña prezidentı Arsen Kanokov üktäber axırında tanılğan jurnalist Anna Politkovskayağa birgän äñgämäsendä Naxuşev''nıñ kiñäşçe bula aluın, anıñ belän oçraşıñ söyläşü telägen äytä. Berniçä könnän, noyäberneñ 4ndä Naxuşev cirle FSB idaräsenä sorawğa çaqırıla. Kiçke 7dä, idarädän çıqtım, 10 minuttam qaytam dip şaltırata, läkin qaytmıy. Yartı säğät kötkännän soñ iptäşläre anıñ kesä telefonına şaltırata, läkin ul cawap birmi. Şunnan birle annan ber xäbär dä yuq.

İkençe köngä ük Naxuşevnıñ tuğannarı prokuraturağa, prezident idaräsendä anıñ yuğaluı turında möräcäğät yaza. Prokuratura da, militsiä dä, FSB idaräse dä anıñ qayda buluı turında berni belmibez dip kildelär.

Comğa könne Rusiäneñ baş prokuror urınbasarı Nikolay Şepel matbuğat oçraşuı ütkärep, Nalçik höcümnären oyıştıruda şiklänelgän 38 keşeneñ qulğa alınuın iğlan itte. Ruslan Naxuşev mäsäläsenä tuqtalıp ul bolay dide: "19 üktäberdä respublika prokurorı Naxuşevqa qarşı 33 häm 205nçe mäddä nigezendä cinäyät eşe açtı. Bez anıñ Nalçikta höcümne oyıştırırğa yärdäm itüen farazlıybız" dide Şepel. Anıñ süzlärençä, xäzer Naxuşevnıñ qayda ikänen açıqlaw öçen çaralar kürelä.

Ruslan Naxuşev Rusiäneñ İslam Mirası isemle waqıfnıñ cirle bülek citäkçese dä bulıp torğan. Waqıf räistäşe Xäydär Camal süzlärençä, Naxuşev möselmannarnı "silovik"lardan yaqlaw, alarnıñ ezärlekläw ğämällären faş itü ölkäsendä zur eş başqarğan, cirle siloviklar arasında anıñ doşmannarı küp. Qayber mäglümätlärgä qarağanda Qabarda-Balqar prezidenıt Kanokov inde küptän qayber qüät citäkçelärennän arınırğa teli, ämmä Mäskäw moña fatixa birmi.

Novaya Gazeta xäbärçese Anna Politkovskaya süzlärençä, aña Kanokov idaräsennän şaltıratıp, ägär äñgämädä prezident Naxuşev belän oçraşırğa cıyına digän süzlär bulmasa, bälki ul yuğalmağan da bulır ide digännär. Politkovskaya fikerençä, bu küpmeder däräcädä yuğalunıñ säbäben añlata. Naxuşev xakimiät belän möselmannar arasında "küper" sala alırday keşe. Ämmä cirle "siloviklarğa" häm alarnıñ Mäskäwdäge iptäşlärenä andıy "küperlär" kiräk tügel.

/ag
XS
SM
MD
LG