Accessibility links

Кайнар хәбәр

Qazan qalası başlıqsız qaldı


Şulay itep, İdel buyı federal' okrugında Putinnıñ yaña wäkile bulaçaq. Sergey Kirienko urınına Başqortstan prokurorı Aleksandr Konovalov bilgelängän. Ä Tatarstan başqalası Qazanda yañaraq qına saylanğan deputatlar yäşeren tawış belän saylağan şähär başlığı Qamil İsxaqov Yıraq Şerıqqa, Pulikovskiy urınına küçerelä. Dimäk berençe köngä Qazan başlıqsız qala. Bu xäbär Tatarstan häm Qazan öçen bik möhim. Çönki Qazanda respublika salımnarınıñ 30 protsentı cıyıla häm Tatarstan xalqınıñ öçtän ber öleşe biredä tuplanğan. Soñğı waqıtta Qazan xakimiäte belän respublika citäkçeläre şähärneñ arxitekturası turında mawığa – mawığa, bäxäsläşep plan qora idelär. Xäzer inde bäxäslärneñ eçtälege dä üzgärä, kiräge dä qalmasqa mömkin.

Monı Tatarstandağı kadrlar inqilabı dip sanarğa mömkin. Häm ul küpçelek öçen kötelmägän ber waqiğa buldı. Rusiä Prezidentı Vladimir Putinnnıñ uzğan yäkşämbedä Qazannıñ küptän tügel saylanğan merı Qamil İsxakov belän oçraşqan ide. Bu xäbär dä iskitärlek Üzeneñ 1000 yıllığın ütkärgän borınğı şähär başlığı ğadi mer tügel, menä şundıy däräcädäge munitsipal' citäkçe dip sanasañ da, ul öçençe eşelondağı kadr. Su torbaları, yuldağı çoqır – çaqırlar, fatir öçen tüläw turında söyläşü öçen Rusiä Prezidentınıñ Qazan başlığın üzeneñ yal itkän cirenä çaqıruı turında iğlan itelgäç, apparat çinovnikları monda nindider xikmätle uyın barlığın sizdelär. İsxakov üze bu xaqta çärşämbe könne belderü yasarğa cıyına digän xäbär taratıldı.

Ber atna elek kenä Tatarstan Prezidentı Mintimer Şäymiev Qamil İsxakovnı şähär üzägendäge tarixi zatlı urınnarnı säwdägärlärgä satıp cibärüdä gäeplägän ide. Xäzer inde wazğiät üzgärde. Rusiä citäkçesendä kadrlar inqilabı digän xäbär çıqqaç, xakimiät apparatında telefonnar mäşgul' buldı, yäisä berkem dä cawap birmäde. Särqatiplär üz citäkçeläreneñ nindider kiñäşmägä kitte digän añlatma birdelär.

Rimzil Wäli

XS
SM
MD
LG